Төв талбай дээр өнөөдөр 34 настай иргэн амиа хорлосон хэрэг гарсан билээ. Энэ талаар тухайн иргэнд анх тусламж үзүүлсэн цагдаагийн алба хаагч болон ЦЕГ-ын Хэвлэл мэдээллийн төвөөс зарим нэгэн мэдээллийг өглөө.

Сүхбаатар дүүрэг дэх Цагдаагийн нэгдүгээр хэлтсийн цагдаа, цагдаагийн дэд ахлагч Б.Даваажав "Өнөөдөр талбай дээр үүрэг гүйцэтгэж байхад төв талбайн баруун урд зүгээс хүн хашгирах шиг болсон. Тухайн иргэнийг харахад сэжиг бүхий байсан учраас шалгахаар дөхөж очиж байтал хоёр алхамын зайтай гал асч эхэлсэн. Тиймээс галыг унтраах гэж хичээсэн ч амь насыг нь аварч чадсангүй ээ. Үнэхээр харамсалтай байна. Тухайн үед амь насыг нь л аврах юмсан гэсэн бодлоос өөр юу ч төрөөгүй" гэв.

Цагдаагийн ерөнхий газрын Хэвлэл мэдээллийн төвийн дарга, цагдаагийн дэд хурандаа Б.Баатархүү "Хэрэг мөрдөн шалгаж байгаа байцаагч нараас нь мэдээлэл авлаа. Амиа алдсан иргэний биеэс гарсан бичиг баримт нь буюу 1987 онд төрсөн Э гэгч өөрөө мөн болох нь тогтоогдсон. Чингэлтэй дүүрэгт амьдардаг. Эрхэлсэн тодорхой ажилгүй. Хувиараа CD, үнэртүүлэгч зэргийг борлуулдаг нэгэн байсан нь урьдчилсан байдлаар тогтоогдсон. Мөрдөн шалгах ажиллагаа явагдаж байгаа учраас тодорхой мэдээлэл өгөх боломжгүй байна. Бичлэг хийж байсан эмэгтэйгээс тайлбар мэдүүлэг авч байна. Тухайн нас барсан иргэний маршрутыг нь тогтооход ганцаараа явсан байсан нь тогтоогдоод байгаа" гэлээ. 

Б.Баатар