Үндсэн хуулийн Цэц  есөн гишүүнтэй. Гэвч тэдний хоёрынх нь бүрэн эрхийн хугацаа дуусаад нэг жил гаруй болж байна. Үндсэн хуулийн Цэцийн тухай хуульд “Үндсэн хуулийн Цэц есөн гишүүнээс бүрдэнэ. Тэдгээрийн гурвыг УИХ, гурвыг Ерөнхийлөгч, гурвыг Улсын Дээд шүүхийн санал болгосноор, УИХ зургаан жилийн хугацаагаар томилно”. Мөн Цэцийн гишүүнээр томилох хүнийг УИХ-д санал болгохдоо УИХ-ын дарга зохих байнгын хороодын санал дүгнэлтийг үндэслэн захирамж, Ерөнхийлөгч захирамж, Улсын Дээд шүүх гишүүдийнхээ олонхийн саналыг үндэслэн зохих шийдвэр гаргана” гээд нарийвчлан заасан байдаг.

Гэтэл Үндсэн хуулийн Цэцийн есөн гишүүний хоёрынх нь, тодруулбал, Ш.Цогтоо, Д.Солонго нарын бүрэн эрхийн хугацаа 2019 оны арванхоёрдугаар сарын 26-нд дууссан ч өнөөдрийг хүртэл хууль зөрчин ажиллуулсаар байгаа нь ямар шалтгаантай вэ. Угтаа бол хугацаа нь дууссан энэ хоёр хүнийг Үндсэн хуулийн Цэцийн гишүүнээс хэрхэн татахыг хуульд тодорхой заачихсан. Үндсэн хуулийн Цэцийн тухай хуулийн гуравдугаар зүйлийн 4-т “...Цэцийн гишүүнийг нөхөн томилохдоо орон гарсан гишүүнийг урьд томилох санал болгосон эрх бүхий байгууллага, албан тушаалтан саналаа 14 хоногийн дотор гаргах бөгөөд түүнийг УИХ 30 хоногийн дотор шийдвэрлэнэ” хэмээсэн билээ.

Хуульдаа 30 хоног гээд тодорхой заачихсан. Гэтэл хуулийг чанд сахиулах, хэрэгжүүлэх үүрэгтэй гол байгууллага нь ийнхүү хуулийн дээгүүр гишгэлж байна. Ийн үлгэр үзүүлж буй Үндсэн хуулийн Цэцэд цаашид ажил үүргээ гүйцэтгэх чадамж, чадвар байна уу. Монгол Улсын Ерөнхийлөгчийн тухай хууль, Ерөнхийлөгч Х.Баттулгад импичмент  үзүүлэх эсэх зэрэг олон асуудал Цэцийн өмнө ирээд буй. Харин улс орны чухал олон асуудлыг шийдвэрлэхэд бүрэн эрхгүй хоёр гишүүнтэйгээр орох уу, эсвэл дутуу бүрэлдэхүүнтэйгээр асуудлыг шийдэх үү. Хоёр гишүүнээ өмгөөлж, хамгаалаад байгаагийн цаад учир юундаа байна вэ. Үүнд, Үндсэн хуулийн Цэц хариулт өгөх цаг нь болжээ.

У.Тэргэл