Прокурорын байгууллага хэвлэлийнхэнд мэдээлэл өгөхдөө хойрго, ихээхэн хаалттай газар. Үеийн үед ч ийм явж ирсэн. Харин шинэ он гарсны дараахан буюу 2021 оны нэгдүгээр сарын 25-ны өдөр Нийслэлийн прокурорын газрын орлогч прокурор Ц.Насанбат гэнэт мэдээлэл хийн, энэ үеэрээ дуулиант хэргүүдийн явцын талаар сэтгүүлчдийн асуултад хариулсан юм. Энэ үеэр олны анхааралд ид ороод байсан УИХ-ын гишүүн Сү.Батболдтой холбоотой асуудлыг, тодруулбал, түүнийг оффшор бүсэд ихээхэн хэмжээний мөнгө байршуулсан. Энэ хэргийг прокуророос шалгаж байгаа эсэхийг хэвлэлийнхэн асуухад Ц.Насанбат прокурор ийнхүү хариулт өгч байв.

Ц.Насанбат:  “УИХ-ын гишүүн Сү.Батболдтой холбоотой эрүүгийн хэрэг үүсгэж, яллагдагчаар татсан, мөрдөн байцаалтын ажиллагаа явуулж байгаа хэрэг байхгүй”. Ийн хэлсэн нь өдгөө хэвлэл мэдээллийн олон байгууллагын архивт үлджээ.

Гэтэл үүнээс хорь гаруйхан хоногийн дараа Ц.Насанбат прокурор хэвлэлд ярилцлага өгч, үүндээ Сү.Батболд гишүүнтэй холбоотой 2006 оноос хойшхи бүхий л үйл явц, факт, оффшор бүс дэх хөрөнгийг битүүмжилж, царцаасан талаарх мэдээллийг баримт судалгаатайгаар дэлгэрэнгүй ярьжээ. Өмнө нь мөрдөж шалгасан ямар ч ажиллагаа байхгүй гэснээ өдгөө гаргаж ирснээ прокурор маань ийн тайлбарлаж байна. Тэрбээр “УИХ-ын гишүүн Сү.Батболдтой холбоотой эрүүгийн хэрэг үүсгэн, яллагдагчаар татан мөрдөн байцаалт явуулж буй эрүүгийн хэрэг байхгүй боловч нийтийн албан тушаалтнуудтай холбоотой оффшор бүсэд компани эзэмшдэг, хууль бус орлогоо нуусан эсэх талаарх мэдээллийн дагуу мөрдөн шалгалт хийж буйг тухайн үед хэлсэн. Тэгээд ч Панамын баримт бичиг гэсэн нэрээр нь олон нийт мэддэг эдгээр асуудлаар үндэстэн дамнасан, зохион байгуулалттай гэмт хэргийн эсрэг НҮБ-ын конвенц, Авлигын эсрэг конвенц, Монгол Улсын хууль тогтоомжийн хүрээнд хэргийг мөрдөн шалгаж буйг дурдсан шүү дээ” хэмээв. Мөн ярилцлагад хэсэгтээ олны анхаарлыг татсан Нью-Йоркийн шүүхээс Оюутолгойн гэрээтэй холбоотой Монголын Засгийн газраас гаргасан нэхэмжлэлийг хэн татчихав, яагаад татав, татсан этгээд нь буруутай юү гэх ташаа ойлголтод хариулт өгөх болов уу хэмээн улс төр рүү ч хальтраад амжив.

Харин өдгөө Сү.Батболд гишүүний “Англид 20 сая, Хонконгод 30 сая, Сингапурт нэг сая, Жерсид 16 сая  ам.долларын зэрэг хөрөнгийн эрхийг битүүмжлэх, царцаах захирамжийг зургаан улсын шүүхээс гаргасан гэдгийг Ц.Насанбат прокурорын ярилцлагаас олон нийт ойлгож, мэдэв.

Ямартай ч, Ц.Насанбат прокурорын хэлж байгаагаар, түүний өмнө хэлснийг хэвлэлийнхэн ухаж сайн ойлгоогүй бололтой. Тэгээд ч манай прокурорын байгууллага дэндүү сайн ажилладгийг, олон улсын хууль, шүүхийн байгууллагуудаас хүссэн мэдээллээ авч чаддагийг, нягт уялдаа холбоотойг дээрх ярилцлагаас харж болох нь.   

У.Тэргэл