УИХ-ын хаврын ээлжит чуулган өнөөдөр нээлтээ хийлээ.

Чуулганыг нээж УИХ-ын дарга Г.Занданшатар “Үндсэн хуулийн дагуу УИХ 75 хоног хуралдах болсон тул хаврын ээлжит чуулга урьдынхаасаа эрт эхэлж байна. Энэ чуулган Үндсэн хуулийн нэмэлт өөрчлөлтийг амилуулах, эрх зүйн хувьсгалыг эрчимжүүлэхэд онцгой чухал ач холбогдолтой байх болно. Үндсэн хуулийн нэмэлт, өөрчлөлтийн амин сүнс нь ардчилал, хүний эрхийг дээдлэх байсан. Монгол Улс хүний эрхийг дээдэлдэг, ардчилсан төртэй улс. 

Тиймээс хууль бүрд хүний эрхийг хамгаалахад анхаарах ёстой. Батлан гаргаж буй хууль бүр хүний эрхийг хамгаалахад чиглэх ёстой.

Хаврын чуулган ардчилал, хүний эрхийн чуулган байгаасай гэж хүсэж байна. Төрийн байгууллагад тулгуурлаж хууль баталдаг өнгөрсөн зуунаасаа салах ёстой. Шүүхийн шинэчлэл энэ сараас эхлэн мөрдөгдөж эхэлсэн. Гэтэл саяхан шүүгчидтэй холбоотой асуудал олны бухимдлыг хүргэж байна. Шүүх засаглалын нэр хүндийг шавартай хутгаж байгаатай хатуу хариуцлага тооцох ёстой. Энэ зуунд Монгол Улсын нэг ч иргэн хилсээр хэлмэгдэх учиргүй. Иймээс УИХ хууль баталхас гадна баталсан хуулийн араас нь хяналт тавих зэрэгт тасралтгүй ажилладаг байх ёстой. Шүүх эрх мэдэлд үүссэн гажуудал, шүүхийн нэр хүндийг унагасан шүүгчдэд холбогдох байгууллагууд нь хариуцлага тооцох нь бүү хэл толгойг нь илж байгаа нь хуулийг зайлшгүй шинэчлэх ёстой байсныг харуулж байна. Монгол Улсад иргэндээ эрүү шүүлт тулгасан гутамшигт явдал дахин болох ёсгүй.

Шударга ёсны төлөөх эрх зүйн хувьсгалыг УИХ цаашид ч үргэлжлүүлэх ёстой. Улс төр эрүүл байх, намууд төлөвших нь төр зөв дархлаатай байх юм. Тиймээс Улс төрийн намуудынхаа санхүүжилтийг цэгцлэх ажил чухал байна. Түүнчлэн энэ чуулганаар Б.Бат-Эрдэнэ гишүүнээр ахлуулсан ажлын хэсгийн боловсруулсан УИХ-ын гишүүний ёс зүйн дүрмийг батлахаар төлөвлөж байна" гэсэн юм.

А.Сүх