"Үнэн ба зөв" намын дарга А.Отгонбаатар коронавирусний халдвараар өвчилж, ХӨСҮТ-ийн сэхээний тасагт эмчлүүлж байгаа талаараа цахим хаягаараа дамжуулан мэдээлэл хийлээ.

Тэрбээр "Миний бие коронавирус авсан гэсэн оноштойгоор 10 гаруй хонож байна. Бие сайнгүй байлаа. Сэхээний тасагт ирсэн. Бие их хүндэрсэн. Сэхээний тасагт ирээд тав хонож байна. Одоогоор би энэ вирусийг ямар хүнээс авснаа мэдээгүй. Энэ вирусний аюул нь халдвар авсан гэдгээ мэдэхгүйгээр бусдад халдаах явдал юм. Коронавирусний шинж тэмдгүүд анх илэрч эхлэхдээ үнэрлэх, амтлах мэдрэмж алдагдаж шөнө халуурч хоносон. Халуурснаасаа болоод салхи сэвээр буруу авсан нь маш хурдан хатгаа болсон байна. Хатгаа нь уушгинд хүндрэл өгч улмаар сэхээний тасаг хүртэл явлаа. Нэг зүйлийг хэлэхэд хэрэв коронавирусний шинж тэмдэг илэрлээ гэдгээ хэлэхэд ойрын тав хоногийн шинжилгээний цаг дууссан байсан.

Тэгэхээр нь Интермед эмнэлэг дээр очиж шинжилгээ өгөхөд шөнө нь шинжилгээний хариу эерэг гарлаа гэдгийг хэлсэн. Гэтэл ХӨСҮТ-ийнхэн гэрээс авч яваад буудалд аваачиж, хоёр хоног байлгасан. Үүнээс болоод бие хүндрэх болсон.

Буудлаасаа эмнэлэгт ирж эмчлүүлсэн. Энэ вирусыг зарим хүмүүс зүгээр ханиад юм уу гээд байна. Үнэхээр зарим хүмүүс ханиад шиг тусаад эдгэрч байна. Харин зарим нэг нь над шиг амьсгалын аппаратад орж, улмаар аппарат хүрэлцэхгүй бол хүндрэл үүсэх аюул тулгарах юм байна. Мөн нөгөөтэйгүүр эмч, эмнэлгийн ажилчдад олгох тэтгэмж, илүү цагийн мөнгийг нь олгох нь зүйтэй юм. Энд тэд үнэхээр хүнд байдалд ажиллаж байна. Улстөрчид өөрсдөө улсынхаа эмнэлэгт үйлчлүүлэх хууль батлуулах хэрэгтэй байна. Ингэж байж л улсын эмнэлэг хөгжих нь. Түүнээс тэд өвдөж, зовохоороо л хувийн эмнэлгээр үйлчилүүлчихээр ард түмний үйлчлүүлдэг эмнэлгийг хэзээ ч засч, тохижуулахгүй нь ойлгомжтой. Эрүүл мэндийн салбар үнэхээр хүнд байна " гэлээ.

Б.Баатар