Баянзүрх дүүргийн Засаг дарга Н.Баярмөнхөөс цаг үеийн асуудлаар тодруулга авлаа.
-Хэсэгчилсэн хөл хорио тогтоогоод байгаа XXVI хороон дээр өглөөнөөс хойш ямар ажил хийв. Цаашдаа тав хоногийн хугацаанд авах арга хэмжээг танилцуулаач?
-Баянзүрх дүүргийн XXVI хороон дээр хязгаарлалтын бүс тогтоож, PCR шинжилгээ авах ажиллагааг эхлүүлээд байна. Энэ ажиллагааг Эрүүл мэндийн сайд, дүүргийн Эрүүл мэндийн төвөөс хүсэлт гаргасны дагуу дүүргийн Засаг дарга захирамж гаргаж, хэсэгчилсэн хөл хориог тогтоодог. Түүнээс бус надад дур мэдэн хэсэгчилсэн хөл хорио тогтоох эрх байхгүй. Одоогоор Баянзүрх дүүргийн XXVI хороон дээр тандалт судалгааны 20 баг ажиллаж байна. Бид болж өгвөл өнөөдөртөө оршин суугчдынхаа 80 хувийг, маргаашдаа багтааж 100 хувь PCR шинжилгээнд хамруулах төлөвлөгөөтэй ажиллаж байна. Шинжилгээ авч дууссаны дараа 50-65 насны иргэдийг вакцинжуулах ажлыг зохион байгуулна.
-Яагаад тус хороог онцолж ийнхүү хөл хорих болов?
-Баянзүрх дүүрэгтээ тус 26 хороо хамгийн томдоо ордог. Нийт 30 мянган хүн амтай. Төр, засгаас аль болох эдийн засгаар нь дэмжих бодлого барьж байгаа ч зайлшгүй шаардлага гарсан учир энэхүү арга хэмжээг авч байгааг иргэд ойлгож, мэргэжлийн байгууллагуудын үйл ажиллагааг дэмжиж ажиллаарай гэж хүсье. Дүүргийн шуурхай штабаас 18 хүртэлх насны 16 мянган иргэнээс PCR шинжилгээ авч, нийт 97000 метр, кв талбайд ариутгал, халдваргүйжүүлэлт хийнэ. Цаашлаад 180 гаруй байгууллага, аж ахуйн нэгж, 270 гаруй орцонд ариутгал хийнэ. УОК-ын даргын хоёрдугаар тушаал гэж байгаа. Үүнд, бүх нийтээр бус хэсэг, хороо, дүүргээр нь хэсэгчлэн хөл хорио тогтоохоор заасан байдаг. Энэ дагуу мэргэжлийн байгууллагуудын ирүүлсэн бичиг баримтад үндэслээд дүүргийн Засаг дарга захирамж гаргасан байгаа.
-Үүрийн гэгээнээс л цагаан хоолойгоор орилж, оршин суугчдыг бухимдуулсан тухай тэд гомдоллоод эхэлсэн. Ийм шаардлага байсан юм уу?
-Энэ байдал иргэдийг бухимдуулсныг ойлгож байгаа. Өнгөрсөн хугацаанд хөл хорио тогтоох сургаар иргэд гэрээсээ гараад явчихдаг. Шинжилгээ үр дүнгүй болдог. Тиймээс орой нь мэдээлэл хүргэж, өглөө нь санамж, зөвлөгөө хүргэсэн байгаа. Шаардлагатай хэрэг гарсан тохиолдолд хорооны засаг дарга, Эрүүл мэндийн төвийн холбогдох дугаарыг өгсөн.
-PCR шинжилгээг гэрээр авах уу. Тодорхой цэгт авах уу?
-Шинжилгээг гэрээр нь авна. Орц орцоор хаалга тогшоод явна. Одоогийн байдлаар 16 мянга гаруй иргэний нэрсийн жагсаалтыг гаргасан . Онгойлгож өгөхгүй тохиолдолд судалгаа авч, яагаад хаашаа гарч явав гэдгийг тогтооно. “Нэг хаалга- нэг иргэн” гэдэг байсан бол энэ удаад 18-аас дээш насны иргэн бүрээс шинжилгээ авна.
-Дархлаажуулалтыг хаана хийх вэ?
-Вакциныг хоёр цэгт хийхээр товлосон. Нэг нь,133 дугаар сургууль, нөгөө нь дүүргийн хорооны байранд хийхээр болж, бэлтгэл ажлаа хангаад байна.
У.Тэргэл
