“Хонгил”-ын өмгөөлөгч гэгддэг Б.Баасанцогт  АТГ-ын Олон нийтийн зөвлөлийн дарга Г.Баасан хатагтайгаас зөвлөгөө авч, түүнийхээ хөлсөнд их хэмжээний мөнгийг төлсөн гэх. Энэ үлгэртээ Г.Баасан өөрөө бүр итгэчихэж. Өөрөө өмгөөлөгч, дээр нь Монголын шүүх, прокурор болоод ҮАБЗ-д нөлөөтэй, хууль хяналтын байгууллагуудын авлигын сүлжээ, хонгилын хэрэгт гүнзгий хутгалдсан Б.Баасанцогт гэгчид Г.Баасангаас өөр зөвлөчих өмгөөлөгч Монголд үгүй гэнэ. Монголын өмгөөллийн байгууллага ингэтлээ доройтчихлоо гэж үү.  Эсвэл тэд ашиг сонирхол нэг болоо юу.

Хамгийн гол нь, 11 шүүгчид 47 сая төгрөгийг хуваан шилжүүлсэн дуулиан ид байхад Г.Баасангийн дансанд цуутай эрхмээс мөнгө шилжүүлсэн баримт нь илрэнгүүт тэрбээр ийнхүү мэргэжлээрээ түрий барихаар шийдсэн бололтой.

Ингэхдээ “Б.Баасанцогт нэг сая 500 мянган төгрөг шилжүүлсэн нь үнэн шүү. Хар даа баримт нь энэ байна” хэмээн бантах. Мэдээж баримт үлдэнэ. Б.Баасанцогт гэгчээс их хэмжээний мөнгийг дансанд нь шилжүүлж, Г.Баасан хүлээн авсан нь гуйвшгүй үнэн, хөдөлшгүй баримт.

Шударга хэмээн нийгэмд өөрийгөө таниулах чин хүсэлтэй Г.Баасан энэ удаад ч яаж л бултаж, булзаад иргэдийг хуурч дөнгөдөг юм гэхэд хууль, хяналтын байгууллагын хараанаас мултрахгүй биз.

Улсын Ерөнхий прокурор Жаргалсайхан  нь Б.Баасанцогт нарын гэх дуулиант хэргүүдийг шалгах ажлын хэсгийг байгуулсан. Ажлын хэсгийнхэн мөрдөлтөө эхлүүлсэн сурагтай. Тэд “хонгил”-ын гэгдэх  өмгөөлөгчтэй холбоотой бүхий л асуудлыг мухарлах учраас Г.Баасан хатагтайтай холбоотой асуудлыг ч шалгаж таарна.  Тиймээс үнэнд гүйцэгдэх цаг ирэхвий.

У.Тэргэл