Хөгжлийн банк гэж нэг хуудуутай газар байна. Тус банкны гүйцэтгэх захирал асан, УИХ-ын гишүүн Г.Амартүвшин чуулганы танхимд мөр зэрэгцэн суугаа хоёр эрхэм болох Х.Ганхуяг, Г.Дамдинням нарт 33 тэрбумын зээлийг албан тушаал, эрх мэдлээ ашиглан олгосон байдаг.

Хөгжлийн банкны гүйцэтгэх захирал Н.Мөнхсүх уг зээлтэй холбоотой хэрэг хууль журмын дагуу яваагүйг хүлээн зөвшөөрч, уг асуудлыг шалгуулахаар АТГ-т хандсан хэмээн ам алдсан билээ. 

Хөгжлийн банк 2012 оноос байгууллага, аж ахуйн нэгж, иргэнд зээл олгож эхэлсэн ч үйл ажиллагаа нь доголдож, Монголбанкинд гомдол, санал олноор ирэх болжээ. Тиймээс Засгийн газраас Хөгжлийн банкны үйл ажиллагаанд хяналт шалгалт хийх ажлын хэсгийг 2016 оны наймдугаар сард байгуулсан байдаг. Цаашлаад 2019 онд Засгийн газраас Хөгжлийн банкны зээлийн төлөлт, чанаргүй зээлийн эзлэх хувь зэргийг яаралтай нэгтгэж, танилцуулахыг үүрэг болгож байв. Түүнчлэн тус банкны чанаргүй зээлтэй холбоотой хэргүүдийг АТГ-аас  шалгаж эхэлсэн юм. Гэвч өнөөдрийг хүртэл үр дүн төдийлөн харагдахгүй байгаа.  

2016 оны байдлаар гэхэд, нийт 5.373.3 тэрбум төгрөгийн зээл олгожээ. Нийт олгосон зээлийг эргэн төлөх нөхцөлөөр нь авч үзвэл, улсын төсвөөс төлөх төсөл, арга хэмжээ нь 54 хувь буюу хамгийн өндөр дүнтэй байгаа аж. Одоогийн байдлаар Хөгжлийн банкнаас зээл авсан томоохон зээлдэгчид  зээлээ төлөлгүй “луу унжиж” ирснээс чанаргүй зээл 13,9, хугацаа хэтэрсэн зээл 70 орчим хувь байна.

Өнөөдрийн байдлаар: 

-"Эрэл ХХК"

-"Бэрэн групп ХХК"

-"Вестернхолд"

-Монгол газрын тос боловсруулах үйлдвэр 

-Шанхмайнинг ХХК

-Түгээмэл түмэн хишиг

-Империал гоүлд майнинг ХХК

-Монватт ХХК

-Инжир ХХК-иуд зээлээ төлөлгүй “гүрийж” иржээ. Тиймээс эдгээр байгууллагын зээлийг төлүүлэх, хөрөнгийг царцаах цаашлаад  үйл ажиллагааг нь зогсоох хүртэл арга хэмжээ авах асуудлыг хөндөөд эхэлжээ.

У.Тэргэл