“Энхсаран” сувиллын захирал  О.Түмэнбаяр болоод МХЕГ-ын холбогдох албан тушаалтнууд болох нийт арав орчим хүнийг ЦЕГ-ын Хүнд гэмт хэрэгтэй тэмцэх хэлтсээс шалгаж буй. Мөн энэ хэрэгт Нийслэлийн прокуророос хяналт тавьж байгаа юм. О.Түмэнбаяр захирал энэ талаар “Цагдаагийн байгууллагаас шалгаж байгаа нь үнэн. Гэхдээ зөв, бурууг одоо хэлэхэд эрт байна” хэмээж байв. Нэг жил хагасын хугацаа өнгөрсөн ч энэ хэрэгт хэн хэн гэгчийг буруутган мөрдөн шалгасан, хэрэг нь ямар шатанд яваа, хэн хариуцлага алдсан зэрэг мэдээлэл хаалттай, бүрхэг байна. Байсхийгээд л энэ асуудлыг УИХ-ын гишүүд сөхдөг ч шалгаж байгаа гэхээс өөрийг хэлэх албан тушаалтан алга.

“Энхсаран” сувиллын захирал  О.Түмэнбаяр тухайн үед нэг тэрбум 300 сая төгрөгийг “халаасалсан” ч үүргээ умартсан нэгэн. Байр нь хүйтэн бохир, хоол нь муу гэх гомдол тухайн үед иргэдээс гарч байсан ч тоосон хүн ховор. Тусгаарлалтад байсан иргэд өрөө өрөө хэсч, мөрийтэй тоглож, ариутгал халдваргүйжүүлэлтийн дэглэм мөрдөөгүйгээс тус сувиллаас дотоодын анхны халдвар илэрч, тусгаарлалтад байсан 40 хүн коронавирусний халдвар авч, ХӨСҮТ-д эмчлүүлсэн билээ. 

Энэ цагаас хойш хариуцлага алдсан албан тушаалтан олон ч эхнээс нь шийдэхгүйгээс бусад нь ч үл тоож ирлээ. “Хариуцлага тооцно. Шалгаж байгаа” гэх улигт үгээс залхсан ард түмэн  өдгөө хэнд ч итгэхээ болиод байна. Олон зуун хүний эрүүл мэнд, амь насанд эрсдэл учруулж, халдварыг нийгэмд тархаасны төлөө хэнбугай нь ч хариуцлагаа үүрэх ёстой. Мэдээж, халдвар тархах нь цаг хугацааных байсан. Гэвч цаг хожиж болох байсан. Тиймээс энэ болоод Баянзүрх дүүргийн эмнэлэг, ХӨСҮТ, “Ачтан” эмнэлэг, “GB” плаза, “Алтай” зочид буудал гээд халдварын голомт болсон газар олон. Үүнд, одоо л төрийн төмөр нударга хэрэгтэй байна.

У.Тэргэл