Монголбанкны ерөнхийлөгч Б.Лхагвасүрэнд "үл тоогдсон" Монголын залуучуудын холбоотой Шударга өрсөлдөөн хэрэглэгчийн төлөө газар хүч хавсрахаар болжээ.
Тус холбооноос залуучуудынхаа хүсэлтийн дагуу Зээлийн мэдээллийн нэгдсэн сангийн сөрөг мэдээлэл буюу хар жагсаалтын талаар Монголбанкны Ерөнхийлөгч Б.Лхагвасүрэнтэй уулзалт товлохоор удаа дараа албан бичиг хүргүүлсэн ч тэрбээр өөрөө хариу ирүүлээгүй байна. Тиймээс холбооны зүгээс өчигдөр Монголбанкны гадаа тайван жагсаал зохион байгуулсан.
Тус жагсаалын дараа ШӨХТГ-ын дарга Б.Бат-Эрдэнэ МЗХ-той уулзах хүсэлт илгээжээ. Тодотговол, тэрбээр цахим хуудсаараа дамжуулан "Аливаа аж ахуй эрхлэгчтэй байгуулсан хэрэглэгчийн гэрээний төлбөрийн маргаан, мөнгөн төлбөрийн үүргийн харилцааг Иргэний хуулиар зохицуулдаг. Цаашид хэрэглэгчийн гэрээний улмаас үүссэн аливаа төлбөрийн маргаан, үлдэгдлийг зээлийн мэдээллийн санд бүртгэхгүй байх, хэрэглэгчдэд санхүүгийн дарамт учруулахгүй байх арга хэмжээг авч хэрэгжүүлэх саналыг "Монголбанк"-д хүргүүлсэн. Монголын Залуучуудын Холбоо -ны удирдлагуудыг Шударга өрсөлдөөн, хэрэглэгчийн төлөө газар -т уулзалтанд урьж байна.
Цар тахал, Ковид-19 халдвар ихсэж байгаатай холбогдуулан жагсаал цуглааныг урьтал болголгүй, эхний ээлжинд хамтарсан уулзалт хийхийг хүсэж байна" хэмээсэн байна.
Үүний дагуу өнөөдөр Монголын залуучуудын холбооны удирдлагууд Шударга өрсөлдөөн хэрэглэгчийн төлөө газрын дарга Б.Бат-Эрдэнэтэй уулзаж, дээрх асуудлыг ярилцаж, зөвлөхөөр болжээ.
Монголын залуучуудын холбооны ерөнхийлөгч О.Гэрэлт-Одын мэдээлж буйгаар "Монголбанкны ерөнхийлөгч Б.Лхагвасүрэн ард түмнээ бус санхүүгийн байгууллага, банкнуудыг талд үйлчилж, залуусыг хар жагсаалтаас гаргах нь бүү хэл энэ талаар сонсохыг ч хүсэхгүй байна. Бид хүлээцтэй хандаж, өчигдрийн тайван жагсаалаа өндөрлөсөн. Гэхдээ ингээд орхихгүй. Залуусынхаа төлөө ажиллах болно" гэдгээ мэдэгдэв.
Мөн тэрбээр "Монголбанкны Ерөнхийлөгч Б.Лхагвасүрэн болоод тус банкны удирдлагууд залуучуудаа үл тоож, хүнд суртал гаргаж байна. Залуучууд улсаас мөнгө гуйгаагүй, зээл тэглэж өгөөч гээгүй, гэмт хэрэг хийгээгүй. Зөвхөн боломж олгохыг хүссэн. Залуучууд тэгш боломжийг хүсэж байна. Зээлийн төлөлтөө хугацаа хэтрүүлж төлсөн боловч үүнээс болж зээл олгосон банк, санхүүгийн байгууллага хохироогүй, тэд үндсэн төлбөрөө хүүтэй нь авдаг. Монголбанкны зээлийн мэдээллийн сангийн сөрөг мэдээлэл зургаан жил хадгалагддаг нь зээл аваад төлбөрөө төлсөн, төлж байгаа залуусыг хохироож ирээдүйн боломжуудыг нь хаасаар байна. Хэрвээ Монголбанк, Сангийн яам энэ асуудлаар ямар нэг хариу өгөхгүй бол ХЭҮК, ҮХЦ-д хандана” гэдгийг хэлсэн.
Харин Монголбанкны хэвлэлийн төлөөлөгч Д.Оргил "МЗХ-ноос Монголбанкны ерөнхийлөгчийн нэр дээр уулзалтын тов хүссэн албан бичгийг өнгөрсөн хугацаанд гурван ч удаа ирүүлсэн бөгөөд энэ хооронд Монголбанкнаас Тэргүүн дэд ерөнхийлөгчийн гарын үсэг бүхий зохих хариуг албан бичгээр хүргүүлж, МЗХ-ны тавьсан хүсэлтийг хүлээн авч, яг хариуцдаг чиглэлийн газрын захиралтай уулзуулъя гэсэн боловч зөвхөн Монголбанкны Ерөнхийлөгчтэй уулзана гээд хүлээж аваагүй. Түүнээс Монголбанк ямар нэг хариу өгөхгүй байгаа зүйл бол огт байхгүй гэдгийг мэдэгдье.
Зээлийн мэдээллийн сангийн бүртгэл нь хувь хүний санхүүгийн сахилга баттай шууд хамааралтай бөгөөд цаанаа банкуудын үйл ажиллагаатай, чанаргүй зээлийн үзүүлэлттэй ч мөн шууд хамааралтай юм.
Зээлийн мэдээллийн санд байгаа иргэдийн түүхийг шинэчлэхэд зөвхөн Монголбанкны ерөнхийлөгчийн эрх мэдлийн хүрээнд тушаал гаргаад шийдчихдэг асуудал биш бөгөөд Зээлийн мэдээллийн санд мэдээлэл нийлүүлэгч бусад байгууллагын хамтын шийдвэрээр эцэслэдэг юм" хэмээн мэдэгдсэн.
Ямартай ч залууст боломж олгож, хар жагсаалтын мэдээллийн санг шинэчилж өгөхийг хүссэн МЗХ-ны хүсэлтийг Монголбанкны удирдлагууд бус ШӨХТГ-ын дарга эерэгээр харж, асуудалд хүч хавсрахаар болж буй бололтой.
Б.Баатар
