ШШГЕГ-ын харьяа хорих ангиудад нөхцөл байдал хүндэрч байна. Хорих анги нь битүү орчин. Мөн нэг өрөөнд олуулаа байдаг учраас коронавирусний халдвар тархах эрсдэл өндөр юм.Өнөөдрийн байдлаар хориход буй 160 орчим хүн коронавирусний халдвар авч, заримыг нь хорих ангийн эмнэлэгт, заримыг нь дотроо тусгаарлаад байгаа  аж.

ШШГЕГ-ын харьяа цагдан хорих 409 дүгээр ангиас халдвар анх илэрсэн. Сэжигтэн М-ийг анх саатуулахдаа шинжилгээ авахад сөрөг гарсан ба харин давтан шинжилгээ нь эерэг гарчээ. Тэрбээр өмгөөлөгчтэйгөө шүүх хуралд оролцсон байдаг. Тиймээс өмгөөлөгч нь хүртэл халдвар авсныг тогтоосон юм.   Тус 409 дүгээр хорих ангид хэргээ шүүхээр шийдүүлэхээр хүлээж байгаа,  мөн шүүхээр хэргийг нь шийдвэрлэн тогтоолоо хүлээж байгаа хүмүүсийг цагдан хорьдог. Тодруулбал, хүлээлгийн байр гэж хэлж болох юм.

Гэтэл коронавирусний халдвар шүүхийн байгууллагуудад илэрсэн учир дийлэнх нь ажиллахгүй, шүүх хуралдаануудыг цуцлаад байгаа. Үүнийг дагаад цагдан хоригдож буй хүмүүсийн эрхийг давхар зөрчиж буй юм. Учир нь, шүүхээс нэг сар цагдан хорих шийдвэр гаргачихаад байхад коронавирусний улмаас хугацаандаа гарч чадахгүй, шүүх хуралдаа орж, хэргээ шийдүүлж чадахгүй ийм нөхцөл байдал үүсчихээд байгаа юм. Хамгийн гол нь шүүхээр хэргийг нь эцэслэн шийдээгүй байхад хэнийг ч гэм буруутайд тооцдогггүй. Энэ талаар хуульч Б.Мэргэн "Коронавирусийн халдвараас болж шүүхүүд нь ажиллахгүй байна. Гэтэл хорих ангид гэм буруутайг нь тогтоогоогүй 100 гаруй хүн коронавирусний халдвараар өвчилсөн байна. Мөн суллагдах боломж нь бүрдчихсэн хүмүүс шүүх ажиллахыг хүлээгээд байж байдаг. Нэг цаг, нэг хоног ч илүү хорино гэдэг хүний эрхийн ноцтой зөрчил”  гэж байна. Энэ бүхнээс харахад, цагдан хорих ангиудад коронавирусний халдвар эрс нэмэгдэж, нөхцөл байдал хүндэрч, нөгөө талд нь хүний эрхийг ноцтойгоор зөрчиж байна.

У.Тэргэл