Ерөнхий сайд Л.Оюун-Эрдэнэ сэтгүүлчдийн асуултад хариулт өгч байна. "Ерөнхий сайд намын дарга байх ёстой юу. Намын тамга атгаагүй Ерөнхий сайд байхаар үүрэх хариуцлагатай дүйх эрх мэдэл байна уу" гэх сэтгүүлчийн асуултад Ерөнхий сайд Л.Оюун-Эрдэнэ хариулт өглөө. 

Тэрбээр "Ерөнхий сайд нь намын дарга заавал байх ёстой. Энэ нь зөвхөн Л.Оюун-Эрдэнэ гэдэг хүнтэй холбоотой асуудал биш. З.Энхболд гэдэг хүн намын дарга байхад Ч.Сайханбилэг гэдэг хүн Ерөнхий сайд байсан гашуун хувь заяа байгаа.

Ж.Эрдэнэбат гэдэг хүн Ерөнхий сайд байхад М.Энхболд намын дарга байсан гашуун хувь заяа бий. Үүнийг би зөвхөн манай Засгийн газрын хувь заяа бус цаашдаа ийм зүйл давтагдахгүй байх ёстой гэж үзэж байгаа. Тиймээс ялаа үүрвэл ямбаа ч эдлэх ёстой. Өөрөөр хэлбэл, улс төрийн болоод захиргааны эрх мэдэл нэг хүний гарт төвлөрөх ёстой. Хэрэв үгүй гэвэл болих ёстой. Үүнийг нэг талд нь гаргаад шийдэх ёстой. Цаашдаа ч үүнийг хуульчлах ёстой гэж үзэж байна. Энэ бол дэлхийн жишиг.

Энэ байдалд би зарчмын хувьд хандаж байгаа. Энэ агуулгаар би анхдугаар чуулган дээр М.Энхболд даргыг УИХ-ын дарга байхад ганцаараа эсрэг санал өгч байсан. Эхнээсээ л би энэ зарчмыг ярьж байсан. Үүн дээрээ ч байгаа. Гэхдээ энэ бол зөвхөн Л.Оюун-Эрдэнэтэй холбоотой биш. Энэ бол засаглалын хариуцлагатай холбоотой, улс төрийн захиргааны эрх мэдэл гүйцэтгэх засаглал төвлөрөхтэй холбоотой асуудал" гэх хариултыг өглөө. 

Б.Баатар