Бид Сүхбаатар аймгийн хоёр дахь, эмэгтэйчүүдээс анхны улсын мэргэн Л.ОДСАЙХАН-тай ярилцлаа.
-Улсын их баяр наадам хаяанд ирлээ. Энэ жилийн бэлтгэл ажил тань хэрхэн үргэлжилж байна вэ?
-Бид бэлтгэлдээ гараад хоёр гурав хонож байна. Удахгүй сайхан жигдэрнэ. Монгол улсын даян мэргэн Эрдэнэтуяагаар ахлуулж 30-аад хүний бүрэлдэхүүнтэй бэлтгэлдээ гараад байна.
-Харваачдын бэлтгэл жилийн турш хэрхэн өрнөдөг вэ? Цаг агаарын нөхцөл хэр чухал нөлөөтэй байдаг вэ?
-Харваачид бид мөн адил цаг агаарын байдал чухал байдаг. Өвөлдөө яг харвааны гэхээсээ илүү сэтгэлзүйн бэлтгэл, зундаа бол зөв техникээр харвах, давтах, эхний ээлжинд олон сум гаргах зэргээр бэлтгэл эхэлдэг.
-Сүхбаатар аймгийн хоёр дахь, эмэгтэйчүүдээс анхны улсын мэргэн болсон хүний хувьд энэ цол танд ямар хариуцлага авчирсан бэ?
Улсын мэргэн болсны дараа өөртөө маш өндөр ачаалал авч байсан. Заавал сайн харвах ёстой гэх мэт. Миний хувьд аймгийн мэргэн, спортын мастераас шууд улсын наадамд айрагдаж үзээгүй байхдаа том цол авсан учраас өөртөө дарамт өгч харваагаа унагаах үе байсан.
-Та сурын харвааны спорттой анх хэрхэн холбогдож байсан бэ?
-Би МУБИС-ыг төгсөж сагсан бөмбөг биеийн тамирын багшаар ажиллаж байгаад анхны багштайгаа танилцаж байсан. Миний багшийн С.Байгальмаа гэдэг. Тухайн үед аймагт тун цөөхөн харваач байдаг байлаа. Эмэгтэй харваачид гарын таван хуруунд багтахаар байсан. Багш маань миний араас жил гаран хөөцөлдөж гүйсэн. Тухайн үедээ “заза нэг татаж үзье дээ” гээд татаж үзсэн. Миний хувьд ямар ч нумыг маш сайн татаж чаддаг. Тийм учраас нум ховор үед надад нум их олддог байсан. Тэгээд л эргэлт буцалтгүй энэ спортод орсон.
-Наадамд түрүүлсэн мөч болон гэр бүлийн дэмжлэгийн талаар хуваалцаач.
-Ээж болохдоо тэгж их баярласан шиг Наадамд түрүүлэх мөч бол гайхалтай сайхан байсан. Жил бүрийн зургаадугаар сард бэлтгэлдээ гардаг. Гэр бүл, нутаг ус, хүүгээ маш их санадаг. Харахад эгэлгүй болоод байгаа мэт мөртлөө маш хүнд спорт. Ханьтайгаа суугаад 14 жил болж байна. Хамт үзсэн наадам гэвэл ганц хоёрхон жил байдаг. Ард үлдэж байгаа гэр бүл ямар их хариуцлага хүлээж байна гэдгийг харж болно. Хань сайтай байх нь маш чухал. Миний хүү багаасаа ээжийгээ түрүүлээсэй гэж залбираад үлддэг.
-Өнөөдөр сурын харваагаар мэргэжлийн түвшинд хичээллэхэд ямар бэрхшээл тулгарч байна вэ? Залуу харваачдад юу гэж зөвлөх вэ?
Яг сурын спортоор хичээллээд амжилттай хангалуун явна гэдэг бол хэцүү. Бүгд л цалингаас цалингийн хооронд явна. Морь бөхийн түвшинд хүрнэ гэж байхгүй. Авсан цалингаа нумандаа зарцуулна. Сэтгэлзүйн өндөр бэлтгэл, тууштай хичээл зүтгэл, хөдөлмөр л амжилтын үндэс болдог.
-Бидэнтэй ярилцсан танд баярлалаа.
