“Хонгил”-ын өмгөөлөгч Б.Баасанцогттой архидан согтуурхсан бичлэг нь ил болсон шүүгч нарт арга хэмжээ авч, хариуцлага тооцохыг “Нэхүүл”, “Дархан Монгол ногоон нэгдэл” ТББ-ынхан шаардаж, Шүүхийн ёс зүйн хороонд гомдол гаргасан билээ. Эл гомдлыг өнгөрсөн баасан гарагт хэлэлцэх байсан ч шүүгч Х.Идэр, З.Болдбаатар нар шүүх хуралтай гэдгээр шалтаглан ирээгүй юм.

Тиймээс гурвууланг байлгаж байж асуудлыг шийдвэрлэх учраас хуралдааныг маргааш буюу тавдугаар сарын 25-ны 09.00 цаг хүртэл хойшлуулсан билээ.

Тодруулбал, энэ удаад Шүүхийн ерөнхий зөвлөлийн Ёс зүйн хорооны анхны хуралдаанаар Сүхбаатар дүүргийн Эрүүгийн хэргийн анхан шатны шүүхийн шүүгч З.Болдбаатар, Булган аймаг дахь Эрүүгийн хэргийн анхан шатны шүүхийн шүүгч Д.Отгонбаатар, Сүхбаатар, Чингэлтэй, Баянзүрх дүүргийн Эрүүгийн хэргийн анхан шатны шүүхийн шүүгч Х.Идэр нарт холбогдох сахилгын хэргийг хэлэлцэх учиртай юм.

Харин Шүүхийн ерөнхий зөвлөлийн Ёс зүйн хороо хуралдааныг тодорхой шалтгааны улмаас нэг удаадаа хойшлуулах эрхтэй. Энэ дагуу хойшлуулсан ба харин маргаашийн хуралдаанд шүүгч нар ирээгүй тохиолдолд албан тушаалаас нь түдгэлзүүлж байж гомдлыг хэлэлцэхийг “Дархан Монгол ногоон нэгдэл” ТББ-ын тэргүүн Д.Даш шаардлаа.

Тэрбээр “Шүүгч Х.Идэр, Д.Отгонбаатар, З.Болдбаатар нар ямар нүүрээрээ шүүх хуралдаанд оролцож, иргэдийн хувь заяаг шийдэж байна вэ. Ёс суртахуунгүй үйлдлээ нийгэмд дэлгэж, өөрсдийгөө шившиглэчихээд одоо бусдын хувь заяаг шүүгээд, шударга царайлж суух нь зохисгүй” хэмээлээ.

Шүүхийн ерөнхий зөвлөлийн Ёс зүйн хороо шүүгч нарыг буруутай гэж үзвэл сануулах, цалингийн тодорхой хувиар торгох, албан тушаалаас нь чөлөөлөх хүртэл шийдвэрийг гаргах эрхтэй ба тэд хуралдаанд тодорхой тайлбар, мэдүүлэг өгөх юм.  Харин гомдол гаргасан ТББ-ынхан ийм ёс зүйгүй үйлдэл гаргасан шүүгч нарыг албан тушаалаас нь чөлөөлөх хэрэгтэй. Бидний зүгээс ийм шаардлагыг эцсээ хүртэл тавих болно гэлээ.

У.Тэргэл