Ерөнхийлөгч асан Х.Баттулга сэнтийгээсээ буухын өмнөх өдөр зарлиг гаргаж, ШШГЕГ-ын харьяа хорих ангиудад ял эдэлж байсан 13 хүнд уучлал үзүүлсэн. Тэрбээр олны танил улстөрчдөд уучлал үзүүлэхийг хүсч, өргөдлөө өгөөч гэсэн ч тэд нь татгалзсан юм. Тухайлбал, Сангийн сайд асан С.Баярцогт, Ерөнхий сайд асан М.Энхсайхан нар хилсээр оноосон ялыг нь биеэр эдлээд гарна хэмээсэн билээ.

Харин уучлалд хамрагдсан 13 хүний дотор ЖДҮ-ийн хэргээр ял сонссон Д.Дамба-Очир, Тагнуулын ерөнхий газрын дарга асан Б.Хурц, яруу найрагч Д.Галсансүх нар багтсан юм.

Харин сүүлийн өдрүүдэд Зам тээвэр, хөгжлийн яамны газрын дарга асан Т.Гомбосүрэнгийн амь насыг хэрцгийгээр хохироосон тус яамны газрын дарга асан Б.Махбалыг мөн уучлалаар сулласан гэсэн мэдээлэл явах болсон билээ. Тэгвэл ШШГЕГ-аас Б.Махбалд уучлал үзүүлээгүй. Түүнд оноосон ял хүчин төгөлдөр үйлчилж байгаа гэх мэдээллийг өглөө.

У.Тэргэл