Сангийн яам, Монголбанк хамтран төсвийн тодотгол болон шинэ бондын талаар мэдээлэл хийх үеэр Сангийн сайд Б.Жавхлан “Засгийн газар өнгөрсөн оны есдүгээр сард олон улс дахь таатай нөхцөл байдлыг ашиглан 600 сая ам.доллартай тэнцэх өрийн удирдлагын зохицуулалтын арга хэмжээ авч хэрэгжүүлсэн. Бид “Чингис”, “Гэрэгэ” бондын нэг тэрбум ам.долларын өр төлбөрийг түүхэндээ хамгийн бага хүүтэйгээр дахин санхүүжүүлж, өрийн зохицуулалтын арга хэмжээ авлаа.

Монгол Улс 2011-2012 онд 12.3-17.3 хувийн өсөлттэй, зээлжих зэрэглэл одоогийн түвшнээс хоёр зэрэглэл дээгүүр байсан эдийн засгийн оргил үедээ 10 жилийн хугацаатай, 5.25 хувийн хүүтэй, 1.5 тэрбум ам.долларын "Чингис" бонд гаргаж байсан. Энэхүү бондын эргэн төлөлтийг ирэх жил хийх гэж байна. Манай улс В үнэлгээтэй улстай харьцуулахад хамгийн бага хүүтэйгээр өмнөх бондуудыг дахин санхүүжүүлж чадлаа. Энэ нь олон улсын хөрөнгө оруулагчдын Монгол Улсад итгэх итгэл өндөр байгааг харуулсан явдал юм. Ингэснээр ирэх жилүүдэд төлөх өрийн дарамт буурах төдийгүй зээлжих зэрэглэлийг сайжруулахад чухал нөлөөтэй юм” гэлээ.