Ерөнхийлөгч асан Х.Баттулгын өнгөрсөн дөрвөн жилийн хугацаанд гацаагаад байсан дипломат албаны томилгоо гацаанаас гарлаа. Гадаад харилцааны сайд Б.Батцэцэг өнгөрсөн хугацаанд энэ асуудлаар олонтаа хандаж, улс орнуудын хооронд таагүй харилцаа үүсэхвий гэсэн болгоомжлол бийг сануулж ирсэн ч экс Ерөнхийлөгч ер хөдлөөгүй юм.

Харин энэ удаад Монгол Улсын Ерөнхийлөгч У.Хүрэлсүх Элчин сайдуудын томилгоог шуурхайлахаар болж, харин Гадаад харилцааны яам энэ салбартаа ажиллаж байсан чадварлаг боловсон хүчнүүд, мэргэжлийн дипломатчдыг оруулж ирсэн нь олны талархлыг хүлээгээд байна.

Тэр дундаа ГХЯ-нд олон жил ажиллаж байгаа, мерит зарчмаар яваа мэргэжлийн хүмүүсийн нэрийг оруулж ирсэн нь энэхүү алба цэвэр гольдролоороо явах эхлэлийг тавилаа.

Засгийн газрын хуралдаанд оруулж ирж буй 25 Элчин сайдын нэрсийг харвал улс төрийн эрх ашгаас ангид байх зарчим баримталж, томилгоог хийсэн нь харагдаж байна.

Монгол Улсын Ерөнхийлөгч У.Хүрэлсүхийн анхны томоохон томилгоонууд Элчин сайд нарынх болж байна. Энэ нь тэрбээр гадаад харилцаанд онцгойлон анхаарч байгаагийн илрэл юм.