УИХ-ын чуулганы нэгдсэн хуралдаанаар төсвийн тодотголыг хэлэлцэж байна. Энэ үеэр УИХ-ын гишүүн С.Одонтуяа “Улс төрийн хилс хэрэгт хэлмэгдэгсдийн мөнгийг хэзээ өгөх вэ. Өмнө гишүүд ямар их мөнгийг, ямар олон удаа өгдөг юм агуулгатай зүйлийг ярьсан. Тийм биш юм. Одоогийн  76 гишүүний 40 нь баталсан хууль бий. Хилс хэрэгт хэлмэгдсэн хүмүүсийн үр хүүхэд сэтгэл санааны хувьд их хэцүү нөхцөлд байдаг. Эсэргүүний хүүхэд гэж олон жил нэрлүүлж ирсэн байдаг. Өндөр настнууд нөхөн олговор харсаар байгаад өнгөрлөө гэдэг. Төр хэлмэгдүүлчихээд, цаазаар авчихаад нөхөн олговрыг олгох ёстой.

Сангийн сайд Б.Жавхлан: 2019 онд 2020 оны төсвийг боловсруулж байхад 53 тэрбум байхад болно гэсэн Цагаатгалын комиссоос өгсөн нэхэмжлэх бий. Энэ мөнгийг олгосон. Гэтэл хүрэхээ байлаа гээд дахин мөнгө нэхсэн.

УИХ-ын гишүүн С.Одонтуяа: Шүүхийн шийдвэр нь гарчихсан 700 гаруй хүн байгаа. Тэдний 37,6 тэрбумыг өгөхгүй бол өдөр шөнөгүй утасдаж байна. Шүүхийн шийдвэр нь гарчихсан мөнгийг яриад байгаа болохоос нэмж өг гээд байгаа юм биш шүү.  

Сангийн сайд Б.Жавхлан: Та хувь хүмүүсээс ирсэн асуудлыг яриад байна. Цагаатгалын комиссоороо дамжуулаад журмаараа яв л даа. Гэхдээ 2022 оны төсөвтөө хэрхэн тусгаж болох нь уу харъя. Ингэж хамтарч ажиллая” гэв.

У.Тэргэл