Шударга өрсөлдөөн хэрэглэгчийн төлөөх газраас өнөөдөр мэдээлэл хийлээ.
ШӨХТГ-ын дарга Б.Бат-Эрдэнэ мэдээлэлдээ, шатахуун түгээх, худалдан борлуулж буй бүх компанийг шалгалтад хамруулсан. Хуурамч шатахуунтай холбоотой хяналт шалгалтыг нарийвчлан хийж байгаа. Иргэний нисэхийн лабораторид мөн давхар шинжилж байгаа. Одоогоор “Петростар” компанийн А92 шатахуунаас механик хольц илэрсэн. Гэтэл зөрчил илэрсэн аж ахуйн нэгжүүд асуудлаас бултаж байна. Тухайлбал, тээврийн асуудлыг Зам тээврийн яам хариуцах ёстой. Гэтэл нэг нэг рүүгээ шилжүүлж, бултаж байна. Тухайлбал, Замын-Үүдэд дугаарын урдуур оруулж өгнө гээд 6 сая төгрөг авсан хэргийг Авлигатай тэмцэх газарт шилжүүлсэн. Дараалал зардаг байсныг энэ мэт хууль бус үйлдлийг Хил хамгаалах газраас зогсоосон.
Т.Батцэцэг:Импорт багассаны улмаас жижиглэнгийн худалдааны үнэ 20 хувиар өссөн
ШӨХТГ-ын бодлого, зохицуулалтын газрын дарга Т.Батцэцэг: “Энэ оны хагас жилийн байдлаар нийт 170 орчим тендерийн гомдол хүлээж авсан. Үүнээс 45 нь хууль зөрчсөн байна. Гомдлын дийлэнх нь эрүүл мэнд болон уул уурхайн салбар, гадаадын зээл, тусламжийн хөрөнгө оруулалтаар хийж байгаа төсөл хөтөлбөр, худалдан авалтын ажилтай холбоотой байна. Тухайлбал, “Эрдэнэт” үйлдвэртэй холбоотой 30 тендер ирүүлснээс 14 нь хууль зөрчсөн дүгнэлт гарсан.
Мөн дөрөвдүгээр сарын 7-ноос БНХАУ- руу тээврийн хэрэгсэл бага багаар нэвтрүүлж эхэлсэн. Гэвч импорт багассаны улмаас жижиглэнгийн худалдааны үнэ 20 гаруй хувиар өссөн. Эрээнээс Улаанбаатар хүртэлх тээвэрт энгийн үед жолооч сард 4-5 удаа тээвэр хийж, 3-3.5 сая төгрөгийн хөлстэй байсан бол импорт багассаны улмаас тээврийн хөлс 20-30 сая болж өссөн байна. Эдгээр шалгалт хийж 38 сая төгрөгийн торгууль ногдуулсан. Цаашлаад үгсэн хуйвалдаж үнийг нэмсэн учир торгуулийг жолооч болон байгууллагад ногдуулахаас өөр сонголтгүй болчихоод байна. Одоогийн байдлаар Улаанбаатараас Эрээн рүү дөрвөн шаттай тээвэр хийж байна. Бараа бүтээгдэхүүн, хүнсний тээврийг дугаарлахгүйгээр нэвтрүүлэх, ачаа тээврийн автомашины тоог нэмэгдүүлэх саналыг Онцгой комисст өгсөн байгаа.
Ш.Цэрэндулам: Цэнхэр, ягаан тасалбар эзэмшигчдийн хувьцаатай холбоотой дутагдалтай зүйл байгааг тогтоосон
Хэрэглэгчийн эрхийг хамгаалах газрын дарга Ш.Цэрэндулам:
-ШӨХТГ, Санхүүгийн зхицуулах хорооны даргын удирдамжийн дагуу хөрөнгө оруулалтын эрхийн бичгээр дамжуулан хувьцаат компанийн хувьцааг эзэмшиж байгаа иргэдийн бичиг баримтад үндэслэн хяналт шалгалт хийлээ. Тухайлбал, 2018 онд их хувьчлалтай холбоотой 2.4 тэрбум төгрөгийн асуудлыг шалгасан байгаа. Үнэт цаасны төвлөрсөн хадгаламжийн төвд 2021 оны байдлаар 29061 иргэний мөнгө байршиж байна.
Цэнхэр, ягаан тасалбарын хувьцаа эзэмшигчдийн хувьцаа болон байгууллага, аж ахуй нэгжийн үйл ажиллагаатай холбоотой дутагдалтай зүйл байгааг тогтоосон. Үнэт цаасны компани холбогдогч байгууллагын хамтын ажиллагаа дутмаг байна. Иймд харилцагчийн эрх ашгийг хамгаалах чиглэлээр хуулийн хүрээнд шуурхай зохион байгуулалт хийхийг үүрэг болгосон. Хоёрдугаарт, иргэдийн дансыг тулгаж, хувьцаа ногдол ашиг тараахдаа төлөвлөгөө боловсруулж, тодорхой үе шаттай өгөхийг тус тус үүрэг болгосон. Мөн нэр бүхий сүлжээ дэлгүүрүүд, ТҮЦ бусад нэгжид хийсэн шалгалтаар нийтлэг 33 зөрчлийг тогтоож, тухайн аж ахуй нэгжүүдэд стандартад нийцүүлэх шаардлага тавьсан. Хүнсний үйлдвэрлэл эрхлэгчид болох “Газар шим”, “Баясах Хульж” зэрэг компаниуд зөгийн бал нэртэйгээр хуурамч бүтээгдэхүүн гаргасан учир таван сая төгрөгийн торгууль ногдуулсан гэлээ.
