Монгол Улсаас гадаад улсад суух Элчин сайд нарын томилгоотой зэрэгцэн Гадаад харилцааны яамны эмэгтэй дипломатууд болох Т.Батцэцэг, Э.Сарантогос, В.Оюу, Д.Гэрэлмаа, Б.Болормаа нар яамныхаа удирдлагуудад хандан АНУ, Кувейт, Франц, Сингапур, Швейцар улсад томилогдож байгаа Элчин сайд нарыг эсэргүүцэн, ямар шалгуураар, яагаад сонгосон талаарх танилцуулгыг өгөхийг  хүслээ.

Тухайлбал, яагаад манай гуравдагч хөрш болох АНУ-д сэтгүүлч, аялагч, хэлний мэдлэгийн хувьд тааруу, яриа хэлэлцээний ур чадваргүй хүнийг томилохыг дэмжив. Олон улсын харилцааны улам бүр хурцдаж буй өнөөгийн нөхцөл байдалд их гүрнүүдээс шууд болон шууд бусаар бидэнд үзүүлдэг дипломат дарамтыг энэ хүн дааж, улсын язгуур эрх ашгийг хамгаалж чадах уу. Яагаад Польш улсын хүчний байгууллагын хар жагсаалтад орсны улмаас өмнө ажиллаж байсан улсаас хугацаанаас нь өмнө татсан, эх орондоо ирснээс хойш ажилласан тайлангаа тавих нь бүү хэл яамаар ч үзэгдээгүй хүнийг дахин томилохыг дэмжив.

“Гуравдагч хөрш” болох Франц улсад сүүлийн хоёр жил орчмын хугацаанд түр хамаарагч ажиллуулсны дараагаар тус улсын ЭСЯ-нд нэгдүгээр нарийн бичгийн даргаар дөнгөж томилогдсон хүнийг огцом дэвшүүлэн томилохыг яагаад дэмжив.

Дипломат албыг цалин хөлс багатай ч ачаалал ихтэй хэмээн голж, олон жилийн өмнө орхин гарсан хүнийг Ази тив дэх чухал түнш оронд томилохыг дэмжсэний учир юу вэ. Яагаад өмнө нь хоёр удаа Элчин сайдаар ажилласны дараа өвчний шалтгаанаар хүсэлт гарган үргэлжлүүлэн гадаадад ажилласан, өөрөөр хэлбэл, сүүлийн долоон жил гадаадад ажилласан хүн гуравдахь удаагаа Элчин сайдаар ажиллахыг яамны удирдлага дэмжив хэмээн энэ цаг үеийн монгол дипломатчдын сор болсон төлөөлөгчид асууж байна.  

Мөн тэд ажиллах хүч, урам зоригийг нь мохооож байгааг, улс, яамныхаа төлөө хоёргүй сэтгэлээр зүтгэх хэрэггүй. Ажлаа унагачихгүй хэмжээнд бай, хажуугаар нь дээрээс татах хүнтэй ойрт, мөнгө хуримтлуул, тэгвэл тооноор орж ирэн Элчин сайд болох боломжтой гэсэн ойлголтыг залуу ажилтнуудад өгч байгаад сэтгэл зовниж буйгаа нуусангүй.

Тэгвэл Франц, Сингапур, АНУ, Кувейт, Швейцар улсад суух Элчин сайдад нэрийг нь санал болгосон эрхмүүдийн хэн нь хэн бэ.

1. Монгол Улсаас Америкийн нэгдсэн улсад суух Онц бөгөөд Бүрэн эрхт Элчин сайд Өлзийдэлгэрийн Батбаяр нь Сэрүүлэг гадаад хэлний дээд сургуулийн англи хэл судлалаар төгссөн, англи, япон, орос хэлтэй, АНУ-ын Сайнт Льюс хотын JCI дэлхийн байгууллагын дэд ерөнхийлөгч, Ази,Номхон далайн бүсийг хариуцсан тэргүүн дэд ерөнхийлөгч, Монгол Улсын сайд, ЗГХЭГ-ын даргын Гадаад бодлого, хамтын ажиллагаа хариуцсан зөвлөх, АНУ, Япон, Солонгос улсад монгол иргэдийг зорчих, аялуулах “Хариуцлагатай аялцгаая” арга хэмжээг санаачлан хэрэгжүүлэгч, 2021 оноос Монгол Улсын Ерөнхий сайдын Гадаад бодлого хамтын ажиллагаа хариуцсан орон тооны бус зөвлөхөөр ажиллаж байжээ. Төрийн албанд гурван жил ажилласан намтартай.
2. Монгол Улсаас Бүгд найрамдах Сингапур улсад суух Онц бөгөөд Бүрэн эрхт Элчин сайдад нэр нь яваа Сосорбарамын Энхбаяр нь МУИС-ийн Олон улсын харилцааны дээд сургуулийг төгссөн, олон улсын харилцааны мэргэжилтэй, магистрын зэрэгтэй “Тэргүүн шадар” дипломат цолтой, хятад, англи, орос хэлтэй. Тэрбээр Олон улсын харилцааны дээд сургуульд туслах багш, багш, ГХЯ-ны Гадаад бодлогын судалгааны төвд мэргэжилтэн, тус яамны Хөрш орнуудын газарт атташе, Хөх хот, Бээжин дэх ЭСЯ-нд атташе, Гадаад харилцааны сайдын зөвлөх, цаашлаад Монгол Улсын Ерөнхий сайдын зөвлөхөөр ажиллаж байсан, 2017-2020 онд Гадаад харилцааны сайдын орон тооны бус зөвлөхөөр ажиллаж байжээ. Тэрбээр төрийн албанд 23 жил, дипломат албанд 11 жил ажилласан байна.
3. Монгол Улсаас Швейцарын Холбооны улсад суух Онц бөгөөд Бүрэн эрхт Элчин сайд Раднаабазарын Алтангэрэл нь Москвагийн Олон улсын харилцааны дээд сургуулийг төгссөн, олон улсын харилцааны мэргэжилтэй. “Онц бөгөөд Бүрэн эрхт Элчин сайд” дипломат цолтой. Франц, орос, англи хэлтэй. Тэрбээр ГЯЯ-ны Ёслолын хэлтэст атташе, Гадаад харилцааны сайдын туслах, гуравдугаар нарийн бичгийн дарга, Монгол Улсаас БНФУ-д суугаа ЭСЯ-нд III, II дугаар нарийн бичгийн дарга, ГХЯ-ны Улс төрийн газрын мэргэжилтэн, Ёслолын хэлтсийн дарга, ЗГХЭГ, Төрийн ёслолын албаны дарга, ГХЯ-ны Төрийн нарийн бичгийн дарга, БНФУ болон Канад улсад суугаа Онц бөгөөд Бүрэн эрхт Элчин сайдаар ажиллаж байсан ба 2018 оноос Монгол Улсаас Бельгийн хаант улсад суугаа ЭСЯ-нд Элчин зөвлөхөөр ажиллаж байжээ. Тэрбээр төрийн албанд тэр дундаа дипломат албанд 31 жил ажилласан байна.
4.  Бүгд найрамдах Франц улсад суух Онц бөгөөд Бүрэн эрхт Элчин сайдаар У.Нямхүүг томилуулах санал гаргажээ. Тэрбээр Хүмүүнлэгийн ухааны их сургуулийг франц, орос хэлний орчуулагч мэргэжлээр, Франц улсын Тулуз хотын их сургуулийг олон улсын харилцааны бакалавр, мөн хотын их сургуулийг гадаад харилцааны магистрын зэрэгтэй төгссөн байна.  Франц, орос, англи хэлтэй. У.Нямхүү нь Франц-Тулуз хотын их сургуульд туслах ажилтнаар ажлын гараагаа эхэлсэн ба ГХЯ-ны Европын газарт атташе, мөн тус газрын Америк, Африкийн газарт атташе, гуравдугаар нарийн бичиг, 2021 оноос Монгол Улсаас БНФУ-д суугаа Элчин сайдын яамны Нэгдүгээр нарийн бичгийн даргаар ажиллаж байна. Төрийн алба тэр дундаа дипломат албанд 11 жил ажиллажээ.
5. Монгол Улсаас Кувейт улсад суух Онц бөгөөд бүрэн эрхт Элчин сайдад Нямаагийн Наранбатыг санал болгосон ч УИХ-ын Аюулгүй байдал, гадаад бодлогын байнгын хороонд нэрийг нь оруулж ирсэнгүй. Энэ талаар Ерөнхийлөгчийн Тамгын газрын дарга Я.Содбаатар “Хар тамхитай холбоотой нэг нэр дэвшигчийг өргөн мэдүүлээгүй. Засгийн газраас нэрийг нь оруулж ирсэн ч шалгаж байгаа учраас оруулж ирээгүй” гэх тайлбарыг өглөө.