Өнгөрсөн долоо хоногийн баасан гарагт АИ-92 зэрэг шатахууны үнийг литр тутамд нь 300 төгрөгөөр нэмсэн. Энэ талаар АМГТГ-аас мэдээлэл хийлээ.

АМГТГ-ын дэд дарга Ц.Эрдэнэбаяр гадаад зах зээлд газрын тосны үнэ өндөр байгаа тул дотоодод шатахууны үнэ зайлшгүй шаардлагаар өссөн, цаашид ч өсөх хандлагатай гэлээ. Энэ талаараа тэрбээр “Яг өртгийн хувьд литр шатахуун 1986 төгрөгт ирж байгаа. “Брент” газрын тосны үнэ 2020 оны зургаадугаар сард 40.8 ам.доллар байсан бол 2021 оны долоодугаар сард 75 орчим ам.долларт хүрсэн. Өөрөөр хэлбэл, бараг нэг дахин өссөн гэсэн үг. Харин шатахууны үнэ энэ хугацаанд 1450 гэдэг үнэдээ тогтмол явж ирсэн.

Засгийн газар, АМГТГ-ын зүгээс 4-5 удаагийн давтамжтайгаар 450 орчим төгрөгийн үнийн бууралтыг хүчээр хийж байсан. Цар тахлын үед эдийн засаг хүнд байна, нийгмийн хариуцлагын хүрээнд үнийн өсөлтийг хийхгүй байгаач гэж импортлогч аж ахуйн нэгжүүдээс хүссэн. Хэрэв үнийг өсгөвөл тусгай зөвшөөрлийг түдгэлзүүлэх хүртэл арга хэмжээ авна гэдэг албан тоот хүргүүлж, ажилласан.  Тэгээд ч бид 100 хувь газрын тосоо импортолж авдаг орон.

Хоёрдугаарт, хүн амын 60 хувь нь вакцинаа хийлгэх хүртэл нийгмийн хариуцлагын хүрээнд үнэ өсгөхгүй байх бодлого барьж ирлээ. Ташрамд, аж ахуйн нэгжүүддээ талархал илэрхийлмээр байна. Тэгээд ч үнийн өсөлтийг хүчээр баривал хамгийн түрүүнд хомсдол үүснэ. Мөн компаниуд үүд хаалгаа барина. Тэгэхээр өртгийн хувьд дараа сард дахиад үнийг нэмэх хандлагатай” хэмээлээ.

У.Тэргэл