Хууль зүйн сайд Х.Нямбаатар цаг үеийн асуудлаар мэдээлэл өгч, сэтгүүлчдийн асуултад хариулсныг хүргэе.

-Замын-Үүдэд буглаад байгаа асуудлыг хэчнээн хоногт шийдвэрлэж, олон сараар гацаад байгаа ачаа барааг хэдий хугацаанд татаж, хэвийн байдалд нь оруулахаар тооцож байгаа вэ?

-Зөвхөн өнөөдөр шалгасан, шийдсэн асуудал биш. Өмнө хууль хяналтын байгууллагууд иргэдээс ирсэн гомдлын дагуу шалгаж байсан. Бугшсан авлигыг нэг талд нь цэгцэлж, цоо шинэ бүрэлдэхүүн ажиллуулахаар Засгийн газар шийдвэрлэсэн. Авлигатай тэмцэх газар ЭХ-ийн тусгай ангийн 22 дугаар бүлэгт заасан авлигын бүх хэргийг шалгаад яваа. Засгийн газар, УИХ-ын  барьж байгаа гол бодлого бол авлига, албан тушаалын хэргийн шалгахыг сулруулж болохгүй гэж байгаа. Авлигын гэмт хэрэгт ялын бодлогыг чангатгасан. Одоо бидэнд зэрэгцүүлж явах нэг тэмцэл бол анхан болон дунд шатан дахь авлигын асуудал болоод байна.

-Хүчин чадлаа  хоёр дахин нэмэгдүүлж, ачаа бараагаа татан авахаа хурдлуулах арга байна уу?

-Бид хэд хэдэн төлөвлөгөөтэй ирсэн. Эрээн боомтод өргөн царигийн зам Хятадын хувийн компанийнх юм байна. Уг компанитай Зам тээвэр хөгжлийн яам урьдчилсан байдлаар хэлцэл хийж, нэг төрлийн овор ихтэй 50 вагон барааг татахаар зохион байгуулсан юм билээ. Замын-Үүдийн боомтоор өдөрт 100 автомашин гаргаж байсныг маргаашаас 120 болгон тоог нэмэгдүүлж байна. Ерөнхийдөө 20 хоногт бөөгнөрсөн ачаа үгүй болно гэж ойлгож болно. Бүхий л арга замыг ашиглаж байна. Карантинд гэртээ харилгүй их удсан жолооч нарыг солилцох зэрэг олон ажлыг зохион байгуулахаар  ажиллаж байна. Барилгын сезоны оргил үед ачаа таваарыг цаг алдалгүй татах талд бүх талын арга хэмжээ авахаар Засгийн газрын Бүрэн эрхт төлөөлөгч томилсон гэдгийг хэлье” гэв.

У.Тэргэл