Хаалга савны хачиртай эхэлсэн энэ долоо хоногийн дуулиан халаа сэлгээ, баривчилгаагаар үргэлжилж байна. Замын-Үүдийн дарга нарт хариуцлага тооцсон өчигдрийн үйл явдал бол намрын улс төрийн уур амьсгал хэдийнэ эхэлснийг илтгэж байна гэсэн сэтгэгдэл хийгээд мэдэмхийрэл сошиал сувгуудаар хөврөв. Үнэн хэрэгтээ энэ халуурал Ерөнхийлөгчийн сонгуулийн дүнг зарлахтай зэрэгцэн эхэлсэн бөгөөд үр дагаврууд нь энэ мэтээр үргэлжлэн явах биз.

Дэлхий хавтгай болохын хэрээр дээдсүүдийн хэрэг явдал ч олны анхаарлаас гарахгүй болсон нь сайн хэрэг. Үүний нэгээхэн жишээ нь сайд хийгээд сайдын дагуулж явсан шуурхай мэдээллэх багийнхны ачаар өчигдөр Монгол даяар цацагдсан Замын-Үүдийн дарга нарын халаа сэлгээ огтхон ч биш.

Харин үүнээс ганцхан хоногийн өмнөх Тагнуулын ерөнхий газрын тусгай ажиллагааны үр дагавар байлаа. Энэ тусгай ажиллагаагаар Цагдаагийн харьяа Дотоодын цэргийн штабын дарга, бригадын генерал Сийлээгийн Ганбатыг баривчлан, ШШГЕГ-ын харьяа урьдчилан цагдан хорих 461 дүгээр ангид саатуулаад байгаа юм. Баривчилгааны үеэр бригадын генерал С.Ганбатын гэрээс их хэмжээний валют буюу 500 мянган долларыг бэлнээр нь эд мөрийн баримт болгон хураан авсан гэсэн эх сурвалжийн мэдээлэл байгаа. Гэхдээ баривчилгааны шалтгаан нь энэ мөнгө биш бөгөөд тусгай ажиллагааны үеэр хэргийн газраас гарч ирсэн гэсэн үг.

Бригадын генерал С.Ганбатыг Эрүүгийн цагдаагийн газрын даргаар ажиллаж байх үеийнхээ хэргийн материал зэргийг хууль бусаар гэртээ хадгалж байсан, мөн хууль бусаар бусдад гүйцэтгэх ажиллагаа, мөрдөн шалгах ажиллагаа хийсэн байж болзошгүй гэсэн үндэслэлээр саатуулаад байгаа юм.

Албан ажлын шугамаар олж авсан хэргийн материалыг өөрийн гэртээ хадгалж байж болзошгүй гэсэн хэргийг шалгах ажиллагааны явцад гэрээс нь дээрх их хэмжээний валютийг илрүүлээд байгаа юм.

Ердөө хоёр сар гаруйн өмнө бригадын генерал цол хүртээд байсан Дотоодын цэргийн штабын дарга С.Ганбатын хувьд Эрүүгийн цагдаагийн газарт туслах төлөөлөгчөөр ажлын гараагаа эхлээд Эрүүгийн цагдаагийн газрын дарга хүртлээ ажилласан, цагдаагийн хүн юм. Эрүүгийн цагдаагийн газрын даргын албаа өгөөд Хонконг дахь консулын газарт зөвлөхөөр ажилласан. Буцаж Монголдоо ирээд 2017 оноос Дотоодын цэргийн штабын даргаар томилогдон ажиллаж байсан юм.

Эрүүгийн цагдаад туслах төлөөлөгчөөс эхлээд дарга хүртэл нь цагдаагийн байгууллагад ажилласан С.Ганбат улс төрийн талаасаа одоогийн УИХ-ын дарга Г.Занданшатар, Сангийн сайд Б.Жавхлан нарын хүрээллийн хүн гэгддэг.

Тиймээс энэ удаагийн баривчилгааг ирэх намрын улс төрийн эхлэл болгон харах үндэслэл байгаа юм. Нэг өгүүлбэрээр хэлэхэд бригадын генерал С.Ганбатын баривчилгаа бол Засгийн газраас Г.Занданшатар даргад өгч байгаа сануулга юм. Учир нь, Тангнуулын ерөнхий газар гэдэг бол Ерөнхий сайдын эрхлэх асуудлын хүрээнд байдаг Засгийн газрын тохируулагч агентлаг. Харин намын дарга У.Хүрэлсүхийг Ерөнхийлөгчийн сонгуульд нэр дэвших шийдвэр гарах үеэр дараагийн намын даргаар УИХ-ын дарга Г.Занданшатарыг нэрлэх бүлэглэлүүд ч санаагаа ил далдаар цухалзуулж байсан билээ.

С.Сүлд