Эрүүл мэндийн салбарын эмч, ажилтнууд цалингаа хоёр дахин  нэмэгдүүлэхийг шаардан, эсэргүүцлийн суулт зарлаад байсан билээ. Тэдэнд дээр Эрүүл мэндийн сайд С.Энхболд өчигдөр очиж, гурван талт уулзалтад урьсан бөгөөд салбарынх нь төлөөлөл оролцоно гэдгээ илэрхийлж байв.

Энэ дагуу Эрүүл мэндийн ажилтны үйлдвэрчний холбоо болон ЭМЯ, Эрүүл мэндийн салбарын хөдөлмөр, нийгмийн зөвшилцлийн гурван талт хамтын хэлэлцээр хийж, санамж бичиг байгуулсан байна. Энэ талаараа Эрүүл мэндийн сайд С.Энхболд  өөрийн цахим хуудастаа ийн бичжээ.

Тэрбээр  “Эрүүл мэндийн ажилтны үйлдвэрчний холбоотой ЭМЯ уулзалт зохион байгуулж, эрүүл мэндийн салбарын хөдөлмөр, нийгмийн зөвшилцлийн гурван талт хамтын хэлэлцээрийг амжилттай зохион байгуулж гэрээгээ баталгаажууллаа.  Эхлүүлсэн ажлаа хамтдаа дуусгана. Бид нэг салбарынхан. Ойлголцох ёстой. Цаашид ч гэсэн ойлголцож, хамтран ажиллах болно гэдэгтээ итгэлтэй байна” хэмээжээ.

Мөн Эрүүл мэндийн сайд С.Энхболд танхимынхаа тэргүүний өгсөн үүрэг, даалгаврыг хэл ам багатайгаар гүйцэлдүүлсэндээ баяртай байгаа аж.  Тодруулбал, Ерөнхий сайд Л.Оюун-Эрдэнэ С.Энхболд сайдыг дуудан “Салбартаа үүсээд байгаа асуудлыг боломж, бололцоогоор нь зохицуул. Гарц, гаргалаа юу байна сайтар судал. Энэ таны хариуцах хамгийн том ажил. Цар тахлын  үед эмч нар ажил хаявал та хариуцлагаа хүлээх үү” хэмээн хатуухан донгодуулаад гарчээ. Энэ дагуу эрхэм сайдтан  Төв талбайд очин эмч, ажилдынхаа үгийг сонсож, зовлон, жаргалаа хуваалцан удтал ярилцсаны эцэст гурван талт хэлэлцээрийн ширээний ард суухаар тохирсон нь ийнхүү үр дүнгээ өгчээ.

У.Тэргэл