Замын-Үүдэд мафи бий болсныг Хууль зүй, дотоод хэргийн сайд Х.Нямбаатар албан ёсоор зарлачихлаа.  Мөн тэмцлээ эхлүүлснээ ч мэдэгдсэн. Тэрбээр “Замын-Үүд суманд АТГ, ЦЕГ, ТЕГ-ын хамтарсан ажлын хэсэг ажиллаж байна. Энэ боомтод яг одоо бус өмнө бугшсан авлига албан тушаалын хэргийг шалгаж, холбоотой зарим хүнд эрүүгийн хэрэг үүсгэж, яллагдагчаар татах үйл явц ид өрнөж байна. Монгол Улсын Засгийн газрын үйл ажиллагааны хөтөлбөрийн хамгийн том зорилт бол авлига албан тушаалтнуудтай тэмцэх юм. Энэ хүрээнд анхан болон дунд, дээд шатанд байгаа авлига албан тушаалын хэргийг шалгаж, цэгцлэх ажил үндсэндээ эхэлж байна. Замын-Үүдийн мафи гэж ярьдаг зүйлтэй Засгийн газар одооноос тэмцлээ эхлүүллээ гэж ойлгож болно” гэсэн юм.

Тэгвэл мафи гэж юу вэ. Энэ нь өөрийн үйл ажиллагааг өргөн цар хүрээтэй, бусдад хэрцгийгээр нөлөөлүүлэхийн тулд хүчирхийлэл, аллага, дээрэм, мөнгө угаах, сүрдүүлэх зэрэг гэмт хэргийг маш өндөр зохион байгуулалттай үйлддэг нууц байгууллагыг МАФИ гэж нэрлэдэг байна.

Цаашлаад хууль бус үйл ажиллагаагаа ямар нэгэн байдлаар баталгаажуулж, ар талаа найдвартай гарт оруулахын тулд төрийн түшмэд, хүчний байгууллагын ажилтнууд, хуулийнхныг гарцаагүй байдалд оруулан бүлэгтээ элсүүлэн авдаг байна.

Мафи  гэдгийг монголчууд гадаадын кинон дээрээс л олонтаа харж, тэр сэтгэхүйгээрээ явж ирсэн. Хар тамхи, мөнгө угаах, зэвсгийн наймаатай холбоотой мафийн бүлэглэлүүд дэлхийд олноор төрж, хоорондоо хэмлэлдэн тэмцэлдэж ирснийг мэдэхээс биш Монголд албан ёсоор “нутагшсан”-ыг сая л мэдэж, сонсож байна.

Тэгвэл Замын-Үүдийн мафийн толгойлогч хэн бэ, бүлэглэлд нь хэн хэн багтдаг вэ. Мэдээж сум, орон нутгийн Захирагч гэдэг утгаараа Замын-Үүдийн Засаг  дарга Б.Анхбаяр толгойлогч уу. Тиймдээ ч ТЕГ, ЭЦГ-ын мөрдөн байцаагчид очсон даруйдаа Засаг дарга Б.Анхбаяр тэргүүтэй зургаан албан тушаалтныг ажлынх нь байрнаас баривчлан саатуулсан гэх гаргалгаа байна.

Толгойлогч гэгдээд буй Б.Анхбаярын хувьд Дорноговь аймгийн уугуул. МУИС-ийг 2006 онд төгссөнөөсөө хойш нутагтаа ажилласан,  ИТХ-ын даргаасаа Засаг даргын албан тушаалд тохоон томилогдсон нэгэн аж. Нутгийн залуу Засаг дарга боллоо хэмээн ард иргэд нь ихээхэн олзуурхаж, одоо л хэмээн найдаж, хүлээж суусан гэдэг. Гэвч байдал эсрэгээрээ эргэж, дуулиант баривчилгааны эхнийх боллоо. 

Мафийн толгойлогч гэдэг асар их мөнгөний эрх мэдэл, эрх ашгийн эзэн байх учиртай. Тэгвэл Б.Анхбаярын хувьд халуун устай орон сууцанд төвхнөж ч амжаагүй эгэл жирийн нэгэн гэдгийг нутгийнхан нь хэлж, дайрлагад өртлөө гэцгээж байна.

Тэгвэл мафийн жинхэнэ толгойлогч хэн бэ. Замын-Үүдийн боомтод хил, гаалийн байцаагчаар ажиллахын тулд олон саяын хахууль өгч байж ажилд ордог. Үүнийгээ хэдхэн сарын дотор нөхдөг тул унацтай ажил хэмээн бүгд хошуурдаг гэлцдэг. Тэгвэл гаалийнхан уу, эсвэл Ерөнхий сайдыгаа ирүүлэн байж асуудлыг өмнөөсөө шийдүүлчихээд хээвнэг суугаа Зам тээврийн хөгжлийн сайд Л.Халтар уу, өргөдлөө өгөх хамгийн эхний хүнээр нэрлэгдээд байгаа МХЕГ-ын дарга Т.Гантулга уу.

Ямартай ч, Засгийн газар Замын-Үүдийн мафитай тэмцлээ эхлүүллээ. Удахгүй толгойлогч байтугай нь ил гарч, тэмцлийн үр дүн нь харагдах  буй заа.

У.Тэргэл