Эрүүгийн цагдаагийн албаны Кибер гэмт хэрэгтэй тэмцэх хэлтсийн дарга, дэд хурандаа н.Тайван цахим гэмт хэрэгтэй холбоотой цаг үеийн асуудлаар мэдээлэл өглөө. Тэрбээр “Цар тахлын энэ үед иргэд цахимаар ажиллах болж, цахим хэрэглээ ч эрс өссөн. Үүнийг дагаад цахим хулгай, дээрэм, залилах гэмт хэргийн тоо эрс өссөн. Манай Кибер гэмт хэрэгтэй тэмцэх хэлтсээс судалгааг байнга хийдэг. Сүүлийн үед өдөр тутмын хэрэглээ болох иргэдийн фейсбүүк хаяг руу хууль бусаар нэвтэрч, нууц үг олзолж авах, найз нөхдөөс нь мөнгө авч залилдаг, банкны нэвтрэх нэр, нууц үгийг олж авч, мөнгийг шамшигдуулах гэмт хэргийн тохиолдол өсч байна.
Фейсбүүк хаягийн нууц дугаарыг иргэд төрсөн өдөр, утасныхаа дугаараар ихэвчлэн хийдэг. Залилагчид энэ мэт хамгаалалт мууг далимдуулан, хувийн мэдээлэл рүү нэвтэрч байна. Мөн фейсбүүк хуурамч хаягийг олноор нээн, эвлүүлэг хийж, олон хүний хандалт авахаар цацдаг. Гадаад улсын энэ чиглэлийн байгууллагад төлбөр төлж, хамтран ажилладаг асуудал ч гарч байна.
Тодруулбал, хортой холбоос тараах замаар нэвтрэх нэрийг олзлон авч ашиг олох зорилгоор бусдад борлуулах, худал мэдээлэл тараан, олон тооны фейсбүүк хаягийг нэг командаар удирдах, түүнийгээ гаднын улсад серверт байршуулан тодорхой сэдвээр захиалга авдаг бүлэглэлийг олж тогтоосон. Жишээ нь, 25-30 насны программ хангамжийн инженер мэрэгжилтэй залуу IT үйлчилгээ үзүүлэх нэрээр харилцагчаа олж авдаг. Иргэдийн сонирхол татах мэдээлэл тарааж, тусгай хаягаар орно уу гэж түгээж байна. Мөн фейсбүүкт “Хүүгүй мөнгө зээлнэ” гэсэн пост оруулж холбоо тогтоодог. Тэндээс оюутан ганц бие, насанд хүрээгүй охидыг сонгож, харилцаа тогтоодог. Овог нэр, гэрийн хаягийг шаардаж авдаг.
Зээлийн хэмжээний 10 хувийн барьцааг урьдчилан авдаг. Дараа нь нүцгэн зураг шаарддаг. Үүнийхээ дараа нүцгэн зургийг гэр бүл, ойр дотныхонд нь явуулна, олон нийтийн сүлжээнд тараана гэж заналхийлдэг. Нэг үгээр, бүрэн өөрийн эрхшээлд оруулахыг эрмэлздэг. Хувийн мэдээллээ өгч эрхшээлд нь орж, дарамтлуулсны эцэст зураг, бичлэгээ өгөхөөс өөр аргагүй, сонголтгүй болдог. Устгуулахын тулд мөнгө төлж, сэтгэл санаа, санхүүгийн эрсдэлд ордог ийм тохиолдол олноор гарч байна. Тиймээс хувийн мэдээллээ бусдад өгөхгүй, таньж мэдэхгүй хүний найзын хүсэлтийг авахгүй байж гэмт хэргийн өгөөш битгий болооч гэж байгаа юм.
Ямар ч тохиолдолд хувийн мэдээллээ бусдад өгөхгүй байж, авсныг мэдсэн даруйд цагдаагийн байгууллагад хандах шаардлагатай байна. Нэг удаагийн хувийн таагүй мэдээлэл чинь насан туршид нь дагаж явах аюултай байдаг учраас гүнээ ухамсарлах шаардлагатай байна” гэв.
У.Тэргэл
