Ардын хувьсгалын 100 жилийн ойн баяр наадмыг цар тахалтай холбоотойгоор улс даяар тэмдэглэхгүй гэсэн Засгийн газрын шийдвэр гарсан. Гэсэн ч баяр наадмыг тохиолдуулан гардуулах цол, шагналд цар тахал хамаагүй гэж үзэж байгаа бололтой. Учир нь, өчигдөр “Бөртэ” ТӨҮГ-т гурван генерал хувцасны захиалга иржээ. Энэхүү үйлдвэр нь зэвсэгт хүчин болон хүчний бусад байгууллагын дүрэмт хувцасыг нийлүүлдэг ганц газар. Генералын гурван дүрэмт хувцасны эзэн нь Тагнуулын ерөнхий газрын дарга, хурандаа П.Одонбаатар, Цагдаагийн ерөнхий газрын дарга, хурандаа Ж.Болд, Төрийн тусгай хамгаалалттай газрын дарга, хурандаа П.Батаа нар ажээ. Тэдэнд Ерөнхийлөгчийн зарлигаар маргааш генерал цол олгох юм байна. Цар тахлын үед цол олгохыг хойшлуулъя гэсэн ч түүхт ойгоор цол авъя гэж хүчний байгууллагын гурван удирдлага гуйсан юм байна. Албан тушаалын ранкаараа эдгээр гурван хурандаа генерал цол хүртэж байгаа ч намтар түүхийн хувьд бас л чамгүй ээдрээтэй явж, цахилгаан шатаар байгуулагынхаа удирдлагад ирсэн гэдэг.

“Генерал” П.Батаагийн балаг

Төрийн тусгай хамгаалалтын дарга , хурандаа П.Батаа бол удаа дараа хариуцлага алдан хэвлэл мэдээллээр чамгүй цоллуулдаг нэгэн. Гэсэн ч ар тал нь “бат” байдаг уу ямартай ч энэ албан тушаал дээрээ чамгүй хугацааг үдэж байна. Хамгийн сүүлд өнгөрсөн хавар 152 сая төгрөгийн өртөг бүхий боржин чулууг талбай тойруулан тавих шахаанд оролцон шуугиан дэгдээж байсан. Түүнийг хэдхэн хоногийн өмнө Замын-Үүд дэх Засгийн газрын бүрэн эрхэт төлөөлөгчөөр томилогдсон, Ерөнхий сайдын зөвлөх Л.Алтангэрэлийн маш ойрын, итгэлт хүн нь гэдэг. Элдэв лобби хийж өнгөрсөн хавраас Тагнуулын ерөнхий газраас Төрийн тусгай хамгаалалтын газрыг салгаж, бие даасан бүтэц болгож чадсан нь түүнийг албан тушаалын ранкаар нь генерал цол руу хөтөлж байх шиг байна. Түүнээс тэрбээр Төрийн тусгай хамгаалалтын дэд даргаар ажиллаж байхдаа 2016 оны арванхоёрдугаар сарын 18-ны орой бааранд өөрийн ажилтан Т.Батбилэгийн хамт согтууран танхайрч цагдаагийн ажилтны хууль ёсны шаардлагыг биелүүлээгүй. Төрийн тусгай хамгаалалтын газрын албаны УНҮ 00-11 улсын дугаартай автомашинаар цагдаа нарыг мөргөхийг завдсан. Цагдаа П.Э-ыг түлхэн унагаан цээжинд нь хоёр удаа, хэвлийд нь нэг удаа, Б.Г-ын дүрэмт хувцасыг урж, Б.Г-ын гар утсыг эвдэн эрх чөлөөнд нь халдсан гэдэг үндэслэлээр шалгагдаж байсан. Түүнийг Төрийн тусгай хамгаалалттай газрын дарга болсны дараахан дэд дарга нь зүй бусаар амиа алдсан. Мөн түүнийг Төрийн тусгай хамгаалалтын газрын даргаар ажиллаж байхад Төрийн ордонд төр нийгмийн нэрт зүтгэлтэн Г.Б учир битүүлгээр амиа алдсан ноцтой хэрэг гарсан. Ерөнхийдөө маргааш генерал гэсэн эрхэм хүндэт цолыг хүртэх хурандаа П.Батаагийн сүүлийн хэдхэн жилийн намтараас түүвэрлэхэд иймэрхүү.

Ерөнхийлөгчийн холбогдож байсан фургон машины хэргийг цагаатгасан “генерал” Ж.Болд

Цагдаагийн ерөнхий газрын дарга, цагдаагийн хурандаа Ж.Болд бол Хэнтий аймгийн уугуул. Одоогийн Ерөнхийлөгч, Ерөнхий сайдын алтан нутгийн хүн. Түүнийг Улсын мөрдөн байцаах газар мөрдөн байцаагчаар ажиллаж, Хэнтий аймгийн цагдаагийн даргаар татагдсан түүнийг ЦЕГ-ын дэд дарга, даргаар гэрлийн хурдаар дэвшин томилогдоход нутгийн ахын татаас байсан хэмээн яригддаг. Ингэж ярих, хардах үндэслэл бас байдаг юм. Одоогоос 13 жилийн өмнө Ерөнхийлөгч У.Хүрэлсүх УИХ-ын гишүүн байхдаа “Хадгаламж” банкнаас их хэмжээний мөнгө луйвардсан хэргээр шүүхийн өмнө очиж байв. Түүнийг 11 сая төгрөгийн үнэтэй фургон машиныг хувьдаа завшсан гэж үзээд хэд хэдэн удаагийн шүүх хурал болж байсан ч эцэстээ хэрэгсэхгүй болгож байлаа. Тухайн үед У.Хүрэлсүхийг төрийн өмчийн оролцоотой байсан “Хадгаламж” банкнаас мөнгө завшиж хувьдаа автомашин авсан хэмээн анхан шатны шүүхээс 2.1 жилийн ял төлөвлөсөн тухай хэвлэлээр мэдээлэл гарч байсан. Харин сүүлд нотлох баримт хангалтгүй хэмээн хэрэгсэхгүй болгож байсан юм. Энэ хэргийн мөрдөн байцаагч нь одоогийн Цагдаагийн ерөнхий газрын дарга, генерал мөрдэсээ зүүхээр бэлтгэж байгаа хурандаа Ж.Болд байсан юм. Тэрбээр УМБГ ажиллаж байгаад У.Хүрэлсүхийг Ерөнхий сайд болсон зун нь Хэнтий аймгийн цагдаагийн газрын даргаар томилогдсон. Төд удалгүй Цагдаагийн ерөнхий газрын дэд дарга, дарга болсон намтартай нэгэн.

Алдарт уяачаас Тагнуулын дарга болсон “генерал” П.Одонбаатар

Тагнуулын ерөнхий газрын даргаар өнгөрсөн жил томилогдсон П.Одонбаатар бол албан байгууллагынхаа уг гарвалаар цагдаагийн хүн. Цагдаагийн дээд сургуулийн 1996 онд төгссөн бөгөөд түүний нэг оны төгсөлтийн найзууд нь Цагдаагийн ерөнхий газрын дарга хурандаа Ж.Болд, Авилгатай тэмцэх газрын дарга З.Дашдаваа нар юм. П.Одонбаатарыг томилохдоо сүүлийн таван жил тасралтгүй төрийн тусгай байгууллагад газар ажилласан байх хуулийн заалтыг зөрчиж томилсон. П.Одонбаатар нь 2015-2018 онуудад тусгай байгууллагад ажиллаагүй бөгөөд алдарт уяач цолтой. Одоогийн Ерөнхийлөгчийн Тамгын газрын дарга Я.Содбаатартай нэг уяаных. Дундговийн уг гарвалтай тэрбээр МАН-ын Сү.Батболдын фракцын дэмжлэгтэй гэгддэг юм.

С.Сүлд