Элчин сайдуудын томилгооны асуудалтай холбоотойгоор иргэдийн төлөөлөл Германы ЭСЯ-ны гадна өнөөдөр үзэл бодлоо илэрхийллээ. 

Эдгээр иргэний хувьд Монгол Улсаас  Бельгийн Вант Улсад суух  Онц бөгөөд Бүрэн эрхт Элчин сайдад томилохоор нэрийг нь оруулаад байгаа Л.Болдыг эсэргүүцэж буйгаа онцолсон юм. 

Тэд "Бельги улсад суух Элчин сайдаар томилогдож байгаа Л.Болдыг эсэргүүцэж байна. Энэ хүн зэвсэг худалдаалахаар 300 мянган ам.доллар авсан гэж эрх бүхий хүн мэдэгдэж байсан удаатай. Энэ нь Өмнөд Солонгос болон Япон улсын аюулгүй байдалд заналхийлсэн, терроризмыг дэмжсэн үйлдэл гэж хардаг. Ийм байхад яагаад заавал НАТО-г хариуцдаг газар руу Элчин сайдаар томилж, явуулж байгаа юм. Элчин сайдаар заавал явах ёстой юм бол яагаад Хойд Солонгос руу явуулж болохгүй гэж. Магадгүй энэ хүнийг Бельги дэх монголчууд эсэргүүцэж, жагсах нь ойлгомжтой. Олон залуус, төрийн бус байгууллагууд бидэнтэй нэгдсэн. Бид Европын холбоо болон холбогдох бүх байгууллагад захидал, хүсэлтээ гаргаж өгч байгаа" гэв. 

У.Тэргэл