Баяр наадмын өдрүүдэд  нийгмийг бухимдуулсан нь Улсын дуу бүжгийн эрдмийн чуулгын захирал Г.Цоггэрэл, “Херо” Б.Баатар нарын найруулан дэглэсэн клип байлаа. Энэ талаар олон хүн сэтгэгдлээ илэрхийлж, халаглан харуусч, төрт ёсны уламжлалаа уландаа гишгэсэнд эгдүүцэж байна. Тэдний нэг бол Соёлын гавьяат зүтгэлтэн, доктор Б.Галаарид ийнхүү бичиглэжээ.

Тэрбээр “Төрийн наадам, гэрийн найр аль аль нь тогтсон ёс, дэгтэй, соёлтой. Наадмын хагас галзуу клипийг хараад үнэхээр дур гутав. Хайран сайхан уран бүтээлчдийн маань хэдээр нь ч алиа салбадайн дүр бүтээлгэсэн юм бэ. Дууны агуулга, утгыг яагаад бодолцоогүй юм бэ. Хоёр жил дараалан согтуу монголын дүрээр бахархлаа. Тийм бахархалт сайхан юм мөн үү. Бөөлжүүлж харлуулах л дутав. Архи уугаад хундагаа шидэж  ч байх шиг.

Бүсгүй хүний хормой хот сөхөж ч байх шиг.  Хаа байна, төрт ёс минь. Хаа байна, монгол өв соёл минь. Хэн гээч мундаг нь зөвлөсөн юм бол. Хэн гээч мундаг нь найруулсан юм бол. Уран сайхны хяналт энэ тэр гэж байгаагүй юм байх даа. Эцэст нь төрийн наадам, айлын найр хоёроо ч олигтойхон ялгаж, салгаж ойлгодоггүй яамтайгаа ухаарлаа. Соёлын яамтай болоход нь алгаа ташин баяр хүргэсэн юмсан. Солиотой клипийг нь хараад амаа барин гасаллаа” хэмээн үзэл бодлоо хуваалцжээ.

У.Тэргэл