Гадаадын улс оронд суух Элчин сайдуудын томилгоо нэг хэсэгтээ олны анхаарлын төвд байсан. Тэдний нэг болох АНУ-д суух Бүрэн эрхэт Элчин сайдад “аялагч” Ө.Батбаярын нэрийг оруулсан нь ихээхэн шүүмжлэл дагуулсан юм. Харин түүнтэй хамт олон орноор аялсан Г.Ганхүү ийнхүү сэтгэгдлээ хуваалцжээ.

Тэрбээр “Найз маань сайд болсноос хойш “аялагч” гэх хамгийн муу хүн болжээ. Хамгийн харамсалтай нь, энэ үгсийг үе үеийн дипломатчид ихээр хэлсэнд үнэхээр гайхав. Тиймээс аялагч хүн аялагчаа өмөөрч монгол “аялагч”, “монгол дипломатч” хоёрын ялгааг хэдэн үгээр хэлье. Аялагч бид төсвөөс нэг ч төгрөг авалгүйгээр санхүүжилтээ өөрсдөө босгож, эрсдэлээ өөрсдөө дааж аялахын зэрэгцээ тухайн орныхоо үүх түүх, соёлын талаар нэвтрүүлэг хийж, олон түмэндээ хүргэхийг хичээдэг. Монгол дипломатч гэр бүлээрээ ихэнх тохиолдолд аав, ээжийгээ дагуулан татвар төлөгчдийн мөнгөөр 3-4 жил тухайн улсдаа амьдарч, үр хүүхдүүдээ үнэ төлбөргүй сургуульд сургадаг. Энэ хугацаанд улс орныхоо төлөө ажилласан юм уу гэвэл бас л тийм биш. Зөвхөн хувийн эрх ашгаа л боддог байсантай олон таарч байлаа. Нөгөө  л алдартай архи, тамхины наймаа сүүл рүүгээ бүр хар тамхинд орцгоосон доо. 1994-2010 оны хооронд  Европт байсан дийлэнх дипломатууд их, бага хэмжээгээр  бүгд л тамхины наймаанд орцгоосон. Европын хурдны зам дээр CD номертой Монголын Элчин сайдын яамны микронууд хэдэн арваараа хөлхөлдөж явахад нь таарч л явлаа. Үүнийг шалгахад нэг их ухаан зарах хэрэггүй паспортынх нь тамгыг л тоолоход болно. Ямар улсын ажил гэхээр нэг сард 10-аас дээш удаа Украйн-Польш,Украйн- Унгарын хилийг том автобустай давдаг билээ.

Японоос хүртэл нэг эмэгтэй нисэн ирж тамхины наймаанд оролцож байсныг мэдэх л юм байна. Ямар ч бизнес эрхэлж үзээгүй мөртлөө долларын саятнууд болсон дипломатууд өнөөдөр ч Гадаад хэргийн яаманд ажиллаж л байгаа. Зүүн Өмнөд Азийн нэг оронд томилогдсон Элчин сайд намайг Европт атташе ч хамаагүй болгоод өгөөч  гэж гуйж байсан тухай яриа хүртэл байдаг. Хойд, урд хөршид томилогдсон Элчин сайд нар ямар гавьяа байгуулсан бэ. Эгийн голын усан цахилгаан станц, Орос руу гарах худалдааны татвар, Замын-Үүдийн нэвтрэх хүчин чадлыг одоог хүртэл шийдээгүй л байна. Урд хөршид томилогдсон консулууд визийн наймаагаар хөлжсөнийг бүгд л сонссон. Харин одоогийн Гадаад харилцааны сайд Батцэцэг  бол би хувьдаа маш сайн ажиллаж байна гэж боддог. Ялангуяа сая тэр Лавровтой уулзсан уулзалт бол маш таалагдсан. Мэдээж энэ дунд олон сайн Элчин сайд байсныг хэлэх нь зүйтэй. Японд байсан Хүрэлбаатар гуай одоо Англид байгаа, Тулга Бельгид, Оч Унгарт, Батбаяр Египетэд суугаа гэх мэт. Одоо Гадаад харилцааны яаманд зүтгэж байгаа залуу дипломатчдын хандлага өөрчлөгдсөн гэж найдъя. Гурван жилийн хугацаанд Батбаяр бид хоёр 20 гаруй улсаар аялж, нэвтрүүлэг хийхдээ маш нягт төлөвлөдөг, дотоод зохион байгуулалт сайтай, хоёр, гурван хэлийг төгс эзэмшсэн нь надад маш их дэм болсныг хэлэх хэрэгтэй. JCI гэх олон улсын байгууллагын дэд Ерөнхийлөгч хэмээх хамгийн өндөр албан тушаал хашиж байсныг нь мэдэх юм байна. Азийн орнуудыг хариуцсан JCI-ийн ерөнхий санхүүч хүртэл хийж байсан байх шүү. Young President Organization салбарыг Монголд нээж байсныг санаж байна. Бизнесийн салбарт маш олон төрөлд амжилттай яваа залуу бизнесмэн. Тиймээс би энэ залууд итгэж байна. Америкчууд энэ хүнийг хүлээж авахгүй гэнэ үү. Харин ч эсрэгээрээ  яг ийм хүн хүлээж авна гэж бодож байна. Энэ олон хүний эргэлзээг тайлж, сайн ажиллаарай гэж захъя даа.

Аялагч Ганхүү...” хэмээжээ.