Засгийн газрын ээлжит бус хуралдаан дуусаж, гаргасан шийдвэрийг Засгийн газрын хэвлэлийн төлөөлөгч Ч.Болортуяа танилцууллаа.

Тэрбээр "Өнгөрсөн долоо хоногт Ерөнхий сайд шуурхай штабт ажиллахдаа Монгол Улсын Засгийн газар авлигыг бууруулах талд манлайлал үзүүлж ажиллана гэдгийг онцолсон. Үүний хүрээнд өнөөдрийн хуралдаанаар авлигын эсрэг ажлын хэсэг байгуулах асуудлыг баталлаа.

Улмаар олон улсын байгууллагын гаргадаг авлигын төсөөллийн индексийн үзүүлэлтийг хоёр оронтой тоонд оруулах зорилтыг дэвшүүллээ. Тодруулбал, тус индексээр 180 улсаас манай улс 111 дүгээр байранд ордог. Тиймээс хоёр жилийн хугацаанд 100-гаас дээш байрт оруулахаар ажиллана. 

Ажлын хэсгийг Хууль зүй дотоод хэргийн сайд Х.Нямбаатар ахлан ажиллах ба салбар бүрийн төлөөллийг багтаасан 15 хүний бүрэлдэхүүнтэйгээр ажиллана. Энэ зун авлигыг бууруулахтай холбоотой хууль, эрх зүйн орчныг сайжруулах ажлыг хийхээр төлөвлөсөн. Эрүүгийн тухай хуульд болон Авлигын тухай нэмэлт өөрчлөлт оруулна. Шүгэл үлээгчдийн тухай хуулийн төслийг эцэслэн боловсруулж, УИХ-д өргөн барина” гэлээ.