Тулгар төрийн 2230, Их Монгол Улс байгуулагдсаны 815, Үндэсний эрх чөлөө тусгаар тогтнолоо сэргээн мандуулсны 110, Ардын хувьсгалын 100 жилийн ой энэ жил тохиож буй. Гэсэн ч коронавирусний цар тахалтай холбоотойгоор энэ жил дээрх ойн баяр наадмыг тэмдэглэхийг нэг жилээр хойшлуулах шийдвэр гаргасан.

Тэгвэл наадмын мэндчилгээнд тулгар төр байгуулагдсан ойг дурдаад байдагт болгоомжтой ханддаг талаараа УИХ-ын гишүүн Д.Цогтбаатар байр сууриа илэрхийлжээ.

Тэрбээр "Энэ удаа Наадам амралт хэлбэртэйгээр сэтгэл бодолд л өрнөөд өнгөрлөө. Наадмын мэндчилгээнд тулгар төр байгуулагдсан ойг дурдаад байдагт би болгоомжтой ханддаг. Тийм учраас би үүнийг дурддаггүй.

Энэ жил жишээлвэл уг үйл явдлын 2230 жилийн ой гэж тоологдож буй бөгөөд ийм агууллагатай олон мэндчилгээ урссан. Бид бол Монгол төрийн залгамж халаа. Өөр улс, үндэстэн энэ газар нутгийг эзэмшин төр улстай, хот сууринтай байсныг бид төрийн аливаа үйлдлээр “хүлээн зөвшөөрсөн” (эсвэл тэгж хожим тайлбарлагдаж болохуйц) байдалтай үйл хөдлөл гаргаад байхыг би дэмждэггүй.

Түүх талаас нь судлаж, мэдэж байх бол өөр асуудал. Дээрх тоололд жишээлвэл Манжийн төр Монгол нутагт засаглаж байсан 220 жилийг оруулж тооцоод байгаа. Энэ бидний төрт ёсныхоо баярт оруулж тэмдэглэх он тоолол мөн үү, биш үү? Зөвхөн үүнийг л хасахад дээрх “ой” маань 2010 жил болоод л бууна.

Ингээд цааш явбал их олон жил хасагдана. Төр засгийн түвшинд албан ёсоор тэмдэглээд байна гэдэг нь зүгээр нэг түүхийн асуудал биш болж байгаа юм. Олон улсын эрх зүйн маргаан хожим гарлаа гэхэд түүхэн эх сурвалжууд болон төрийн бодит үйл ажиллагаа нэн чухал баримт болон ашиглагддаг" гэжээ.