Орон нутаг дахь халдварын тоо хэдийнэ Улаанбаатар хотынхоос давлаа. Өнөөдөр гэхэд Улаанбаатарт 514, орон нутагт 724 тохиолдол бүртгэгдэв.

Баяр наадмаас өмнө энэ тоо эсэргээрээ буюу орон нутагт бага, нийслэлд өндөр бүртгэгдэж байсан билээ.

Ерөнхий сайд Л.Оюун-Эрдэнэ долоодугаар сарын 13-ны өдөр УОК-ын шуурхай штаб дээр ажиллах үеэрээ “Хөдөө орон нутаг руу явах хөдөлгөөнийг хянахгүй бол хотод тохиолдлын тоо буурч, орон нутагт нэмэгдэж магадгүй. Одон медалийн дараа халдварын тоо нэмэгдсэн шиг зүйл болох вий. Түүнийгээ тооцож ажиллаарай. Хэрэв хөдөө орон нутагт хүндрэл гарвал хэрхэн ажиллах төлөвлөгөөг гаргасан биз дээ” гэдгийг холбогдох албаныханд хэлж, сануулсан. Энэ дагуу ямар ажил, арга хэмжээ авсан нь одоогоор тодорхойгүй байгаа. 

Өнөөгийн нөхцөл байдал яг түүний хэлснээр болж, коронавирусний халдвар орон нутагт нэмэгдэж байна.

Угтаа Ерөнхий сайдын өгсөн дээрх сануулгыг холбогдох албан тушаалтнууд нь ажил хэрэг болгож, үүнд анхаарал хандуулсан бол орон нутагт халдварын тоо ингэж эрс нэмэгдэх байсан уу гэдэг эргэлзээтэй. 

Ямартай ч одоо орон нутагт эрсдлийг буруулах, өвчилсөн иргэдийн эрүүл мэнд, амь насыг авран хамгаалахад анхаарал хандуулах нь чухал болоод байна.

Хөдөө орон нутгийн эрүүл мэндийн төвүүдийн хүчин чадал, амьсгалын аппарад зэрэг шаардалагатай тоног төхөөрөмжийн хүрэлцээ хангамж, эмч мэргэжилтнүүдийн нөөц боломж зэрэгт одооноос анхаарал хандуулахгүй бол нөхцөл байдал хүндрэх эрсдэл ойрхон байна. 

Р.Алтан