Монгол Улсын Засгийн газрын ээлжит хуралдаан өнөөдөр болсон. Хуралдаанаас гарсан шийдвэрийг танилцуулж байна. 

Ерөнхий сайдын хэвлэлийн төлөөлөгч Ч.Болортуяа "Засгийн газрын хуралдаан болж, арав гаруй асуудлыг хэлэлцэн шийдэрлэлээ. Монгол Улсын нийт хүн амын 60 хувь коронавирусний эсрэг вакцины бүрэн тунд хамрагдаад байгааг Эрүүл мэндийн яамнаас мэдээлсэн. 12-17 насны хүүхдүүдээ вакцинжуулснаар нийт хүн амын 70 хувьд хүрнэ гэж тооцоолж байна.

Коронавирусний мутацлагдсан хувилбар буюу дельта вирус манай улсад бүртгэгдсэн. Энэ өвчний хүндрэл нь өндөр. Дархах чадвар мөн өндөр. Тиймээс Эрүүл мэндийн яам, УОК-оос иргэддээ халдвар хамгааллын дэглэмээ барихыг зөвлөж байна" гэв. 

Мөн тэрбээр "Дэлхийн эрүүл мэндийн байгууллагаас коронавирусний гуравдахь тунг зөвшөөрөөгүй байгаа. Учир нь зарим улс оронд нэгдэх тунгаа ч хийж эхлээгүй байгаа учир вакцины хүрэлцээнээс шалтгаалан зөвшөөрөөгүй. Гэхдээ манай улс наймдугаар сард зорилтод бүлэгтээ гуравдахь тунг хийхээр төлөвлөж байгаа" гэв.  

Харин есдүгээр сард хичээл эхлэх эсэх талаар "Ерөнхий сайд салбарын сайд болон холбогдох албанханд есдүгээр сард хичээл сургуулийг эхлүүлэх чиглэлийг өгсөн. Гэхдээ дельта вирусний тархалтаас шалтгаалан шийдвэр гаргана. 6-11 насны хүүхдүүд вакцинд хамрагдахгүй учир эрсдэл өндөр байгаа" гэлээ. 

Б.Баатар