Цагдаагийн алба хаагчид иргэдийг эрүүдэн шүүж байгаа бичлэгийн талаар АН-аас байр сууриа илэрхийллээ.  

АН-ын Ерөнхий нарийн бичгийн дарга Ч.Өнөрбаяр "Монгол Улсад хамгийн үнэт зүйл хүний эрх, эрх чөлөө. Гэтэл иргэний эрх чөлөөг зөрчдөг, түүний хажуугаар дуугүй өнгөрдөг төр засаг, эрх баригч нартай байж таарахгүй. Өмнө нь хоёр ялтан нэгнийгээ зодоход УИХ-ын гишүүд уйлж хайлж, тухайн үеийн ХЗДХ-ийн сайд буюу одоогийн ЗГХЭГ-ын дарга халаглаад сууж байсан. Гэтэл өөрийг нь ХЗДХ-ийн сайдаар ажиллаж байх үед хүний эрхийг ноцтой зөрчиж, иргэдийг тамлан зовоосон цагдаагийн албан хаагчдыг мэдээгүй өнгөрсөн болж таарлаа.

Ийм хариуцлагагүй байж болохгүй. Одоо энэ хүмүүстээ хариуцлага тооцох ёстой.

Монгол Улс иргэнээ үзэн яддаг, дайсан гэж хардаг цагдаатай болжээ. Монгол Улсын хамгийн үнэтэй баялаг монгол хүн гэсэн. Гэтэл үнэтэй баялгийг чинь эвдэж, нухчин дарах гэж байна. Та хэлсэн үгэндээ эзэн болох ёстой" гэв.