АТГ-ын мөрдөн шалгах хэлтсээс НПГ-ын дарга асан Ш.Нямдоржийг саатуулж, гэрт нь нэгжлэг хийжээ. Түүнийг авлига, албан тушаалын хэргээр шалгаж байж магадгүй байна.

Тодруулбал, өнгөрсөн гуравдугаар сард АН-ын дарга С.Эрдэнэ нэгэн ноцтой мэдэгдэл хйж байсан билээ. Тэрбээр " 2021 оны гуравдугаар сарын 1-нд З.Энхболд надруу ярьсан. Хоёрдугаар сарын 24-ний өдрөөр огноолоод Нийслэлийн прокурорт өргөдлөө өг гэсэн, би өгсөн. Нийслэлийн Ерөнхий прокурор Ш.Нямдорж гэдэг нөхрийн туслах нь миний өргөдлийг хүлээж авсан. Бичиг хэргээр аваагүй. 19.30 цагийн үед Х.Баттулгын шадар туслах Түвшинжаргал залгаж, бичиг өгье гэсэн. Тэр нь Нийслэлийн прокурор Ц.Насанбатын гарын үсэгтэй, надад үүсгэсэн эрүүгийн хэргийг хэрэгсэхгүй болгох тогтоол байсан. Яахаараа Нийслэлийн Прокурорын тогтоолыг Монгол улсын Ерөнхийлөгчийн Шадар туслах өгдөг юм.

Бүтэн жилийн турш миний ойрын хүмүүсийг барьж, хорьж, үндэслэлгүй хэргээр гүтгэж гүтгэж, тамлачихаад гуравхан цагийн дотор хэрэгсэхгүй болгосон. Х.Баттулгын талынхны үгэнд ороогүй болохоор гурав хоногийн өмнө Нийслэлийн прокурор Ц.Насанбатын хэрэг хэрэгсэхгүй болгосон тогтоолыг Нийслэлийн Ерөнхий прокурор Ш.Нямдорж нь хэрэгсэхгүй болгож, нөгөө хэргийг дахин сэргээчихсэн. Өнөөдөр хэн нэгэн эрх мэдэлтний дохио зангаагаар хууль шүүхийн байгууллага ажиллаж байгаагийн тод жишээ бол энэ.  Бодит байдлыг хаана ч хэлнэ" гэсэн билээ.

Дээрх асуудалтай холбогдуулан Ш.Нямдоржийг албан үүргээс нь чөлөөлж байсан юм.