УИХ-ын дарга Г.Зандаршатар өнгөрсөн мягмар гарагт Монголбанкны Тэргүүн дэд Ерөнхийлөгч Г.Дөлгөөнийг хүлээн авч уулзан мөнгөн дэвгэртийг үнэгүйдүүлэхгүй байх зарчмыг баримталж, том мөнгөн дэвсгэрт хэвлэн гаргах талаар судлахыг үүрэгдсэн.

Тэгвэл том мөнгөн дэвсгэртийг ямар тохиолдолд гаргадаг вэ. Төгрөгийн худалдан авах чадвар суларсан, гүйлгээнд ашиглагдахгүй болсон үед гаргадаг гэдгийг эдийн засагчид тайлбарлаж буй бөгөөд манай улсад том мөнгөн дэвсгэрт гаргах хэмжээнд хүрээгүй аж. Хэрэв гүйлгээнд нэвтрүүлбэл эдийн засаг сэргэх биш эсрэгээгээ төгрөгийн ханш сулрах зэрэг олон хор уршгийг дагуулна гэдгийг онцолж байгаа юм.

Тухайлбал, эдийн засагч Д.Амгалан “Дундаж цалингийн хэмжээ бага, өндөр инфляцитай цаашид ч нэмэгдэх хандлагатай, мөн эдийн засаг эмзэг байгаа энэ үед том мөнгөн дэвсгэрт гаргах нь эдийн засагт бүр их хортой. Том мөнгөн тэмдэгтийн хэрэгцээ юу гэдгийг судлах ёстой.

Манайд төгрөгийн худалдан авах чадвар суларсан, гүйлгээнд ашиглагдахгүй болсон үед гаргадаг.

Нөгөөтээгүүр, төр засаг эдийн засгийг удирдаж чадахаа байж гэдэг сэтгэгдэл төрнө. Төгрөгийг үнэгүйдүүлж байгаа хэлбэр шүү дээ. Дээр нь жижиглэнгийн үнэ бүхэлчлэх хувилбар руу шилждэг. Мөн төгрөгийн итгэл буурснаар долларын урсгал бий болох зэрэг хүндрэлүүд гарна. Бид хэт уламжлалт, бурангүй бодлогыг сонгож хэрэгжүүлж болохгүй” гэсэн бол Эдийн засгийн бодлого, өрсөлдөх чадварын судалгааны төвийн захирал, эдийн засагч Б.Лакшми “Эдийн засгаа төрөлжүүлээгүй, экспорт болон гадаад хөрөнгө оруулалт буурсан, гадаад өр төлбөр нэмэгдсэн, ихэнх бараа бүтээгдэхүүнээ импортолж байгаа ийм үед том мөнгөн дэвсгэрт гаргавал эдийн засгаа булшилж байгаагаас ялгаагүй” хэмээн хэвлэлд өгсөн ярилцлагаа тодотгожээ.

Эдийн засагчид нөхцөл байдал хүнд байгаа энэ цаг үед том мөнгөн дэвсгэрт гаргавал инфляци улам хөөрөгдөж, төгрөгийн ханш суларч, өргөн хэрэглээнийхээ ч бараа бүтээгдэхүүнийг авах чадваргүй болно гэдэгтэй санал нэгдэж байна.

УИХ-ын даргад олон зөвлөх бий. Гэтэл алсын хараагүй, өнөө маргаашаа аргацаасан шийдэл гаргаж, үүрэгдээд сууж байгаагаас нь харахад зөвлөхүүдээс нь нэг нь ч том мөнгөн дэвсгэрт гаргасны дараах хор уршгийг хэлж, тайлбарлаж өгөөгүй бололтой. Иргэд Венесуэлийн алдааг давтах вий гэсэн айдастай байна, УИХ-ын дарга аа. 

Б.Лхам