УИХ-ын сонгуулийн 18, 28 дугаар тойрогт нэр дэвшигчдийн нэрс энэ сарын сүүлчээр тодорхой болно. Одоогоор улс төрийн намуудаас нэр дэвших магадлал хүмүүсийн нэрс яригдаж байна. Тэгвэл нөхөн сонгуулиас өмнө хоёр талд хуваагдаад байгаа АН нэг цул болж чадах уу, хэнийг нэр дэвшүүлэх вэ гэдэг асуудал олны анхаарлыг татаж байна. 

Мөн зарим улстөрчид ч өөрийн байр сууриа илэрхийлээд буй бөгөөд АН нэгдэж, хүчтэй лидерийг гаргаж ирж чадахгүй бол энэ удаагийн сонгуульд ч ялагдана. Хоёр хүнийг даргаар өргөмжилж, дотоод асуудлаа шийдэж чадахгүй байгаа тул иргэдийн итгэлийг авч чадахгүй байна гэж дүгнэж буй. 

Гэвч нөхөн сонгууль болоход сар гаруйгийн л хугацаа үлдсэн. Тэдний эрх мэдлийн төлөөх "дайн" энэ хугацаанд дуусаж, амжилт гаргана гэдэг юу л бол. Дотоод асуудлаа шийдэж чадаагүй цагтаа сонгуульд оролцох тухай яриад ч хэрэггүй гэдгийг өнгөрсөн Ерөнхийлөгчийн сонгууль ч батлан харуулсан шүү дээ. 

Тэгвэл УИХ-ын нөхөн сонгуульд УИХ-ын гишүүн О.Цогтгэрэл болон түүний дэмжигчид дараах байдлаар оролцох аж. 

Энэ талаар тэрбээр цахим хуудастаа "АН-аас гэх хаягтай эзэн биегүй, гарын үсэггүй албан бичгийг “УИХ-ын гишүүн О.Цогтгэрэлд” гэж хандан ирүүлжээ. Миний хувьд байр суурь тодорхой.

“Ардчилсан намын дүрмийн хүрээнд бүх гишүүдээсээ сонгогдож, Их хурлаар батламжлагдсан, Дээд шүүхээр баталгаажаагүй байгаа дарга”-ын хувьд ярилцая гэвэл уриалгыг нээлттэй хүлээн авч оролцоно.

Харин “Ерөнхийлөгч асан Ц.Элбэгдорж болон АН-ын дарга асан С.Эрдэнэ нарын ялах зорилгогүй, наймаалцагч нам гэх хоршлыг хүлээн зөвшөөрөхгүй. Гэхдээ АН-ын нэрийн өмнөөс дүрмийн дагуу дэвших аливаа нэр дэвшигчийг дэмжиж ажиллах” байр сууриудыг АН-ын төлөөллийн төв байгууллагад удахгүй илэрхийлнэ" гэжээ.

А.Сүх