Ерөнхий сайд Л.Оюун-Эрдэнийн санаачилгаар баригдсан “Андлалын өргөө” оюуны өмчийн маргаан дагуулж улмаар нураахаар болоод буй. Тус цогцолбор нь нийт 5 тэрбумын төсөвт өртөгтэй бөгөөд барилгыг улсын төсвөөс 2 тэрбумаар босгожээ. Харин гүйцэтгэгч компаниас 1,8 тэрбумыг буцаан өгсөн байна.

Үүнтэй холбоотой асуудлаар БОАЖ-ийн сайд Н.Уртнасан “Засгийн газраас аялал жуулчлалыг бодлого шийдвэрийн хүрээнд Хэнтий аймгийн дөрвөн суманд түүхэн бүтээн байгуулалтын ажлыг 2018 оноос хийж байна. Үүний нэг нь тус аймгийн Батноров суманд баригдаж байсан “Андлалын өргөө” юм.

Тус барилгыг МУСГЗ Д.Эрдэнэбилэг агсан зохиосныг мэдэж байгаа.

БОАЖЯ, Хэнтий аймгийн Засаг даргын тамгын газар, төслийн гүйцэтгэгч компанитай гурвалсан гэрээ хийж, барилга угсралтын ажил явагдаж эхэлсэн байдаг. Гэвч МУСГЗ Д.Эрдэмбилэг хүнд өвчний улмаас барилга угсралтын ажил ид явагдаж байх үед нас барсан.

Яамнаас уг төслийг үргэлжлүүлэхтэй холбоотой судалгааг хийж, Д.Эрдэмбилэг агсны шавь нартай уулзаж, анхны зураг төслөөр нь үргэлжүүлэх боломж байгаа эсэх талаар үйл ажиллагаа явуулсан ч оюуны өмчийг эзэмшигч нь өөрөө барилгын явцад хяналт тавих боломж хязгаарлагдсан учраас зураг төслийг үргэлжлүүлэхэд хүндрэл үүсэж байна гэсэн дүгнэлт гарсан юм.

Үүнтэй холбогдуулан Д.Эрдэмбилэг агсны гэр бүлээс “Хос санаа” ХХК-д оюуны бүтээлийг зохиогчийн эрх шилжүүлэх гэрээг цуцлах хүсэлт тавьсан.

Мөн тухайн гэр бүлээс БОАЖЯ-нд “Андлалын өргөө”-г буулгаж, зохиогчийн нэр хүндэд дахин халдахгүй байхыг хүсэж байна гэж хандлаа.

Улсын төсвөөс гарсан 1.9 тэрбум төгрөгийг “Хос санаа” ХХК буцаан төвлөрүүлсэн. Нураахтай холбоотой зардлыг тухайн компани хариуцан ажиллаж байна. Эцсийн тооцооллыг гаргаагүй байгаа. "Андлалын өргөө"-г нураахтай холбоотой зардлыг улсын төсвөөс гаргахгүй" гэлээ.

А.Сүх