УИХ-ын 18, 28 дугаар тойрогт болох нөхөн сонгууль ирэх аравдугаар сарын 10-нд болохоор товлогдсон. Энэ удаагийн сонгуульд есөн нам, нэг эвсэл болон бие даан нэр дэвшигчид оролцоно. Тухайлбал, парламентад суудалтай Монгол ардын нам, Ардчилсан нам, “Зөв хүн электорат” эвсэл болон Үнэн ба Зөв нам, Шударга иргэдийн нэгдсэн эвсэл нам, Дэлхийн монголчууд нам, Гэр хороолол хөгжлийн нам, Эрх Чөлөөг Хэрэгжүүлэгч нам, Ард Түмний олонхийн засаглал нам, Иргэний зориг ногоон нам нар мөрийн хөтөлбөр, хандивын тайлангаа хугацаанд нь хүргүүлээд буй юм. 

Сонгуулийн тухай хуулийн 52.5.4-д зааснаар “сонгогчдын нэрийн жагсаалтыг энэ хуулийн 20 дугаар зүйлд заасан журмын дагуу үйлдэж, санал авах өдрөөс 12 хоногийн өмнө хэсгийн хороонд өгөх”-өөр заасан.

Ээлжит бус болон нөхөн сонгууль зохион байгуулахтай холбогдон гарах зардлыг УИХ тухай бүрд нь баталж улсын төсвөөс санхүүжүүлэх, зардлыг Засгийн газрын нөөц сангаас гаргахаар зохицуулсан байдаг. Үүнтэй холбогдуулан нөхөн сонгуулийн улсын төсвөөс санхүүжүүлэх зардлын хэмжээг 2 тэрбум 287 сая төгрөгөөр баталсан билээ.

Нөхөн сонгуульд намууд нэр дэвшигчээ есдүгээр сарын 1-ний дотор тодруулах ёстой.

Одоогоор улс төрийн намуудаас нэр дэвших магадлал өндөр хүмүүсийн нэрс албан бусаар яригдаж байна. Эрх баригч МАН-ын хувьд өмнө нь болсон намын бага хурлын үеэрээ энэ сарын сүүлчээр дахин хуралдаж нэр дэвшигчдээ зарлахаа мэдэгдсэн. Тус намаас Ерөнхийлөгч асан Н.Энхбаярын хүү Э.Батшугар нэр дэвших магадал өндөр хүнээр нэрлэгдэж байгаа бол түүний араас нийслэлийн Засаг даргын орлогч Ж.Сандагсүрэн, Хэнтий аймгийн Засаг дарга асан Н.Ганбямба мөн хүчингийн хэрэгт холбогдсон Д.Гантулга нарын нэрс яригдаж байгаа юм.

Харин сөрөг хүчнээс Ц.Баатархүү, УИХ-ын гишүүн асан Б.Гарамгайбаатар, Л.Гантөмөр, М.Тулгат нар нэр дэвшиж магадгүй гэсэн яриа бий. Юутай ч нөхөн сонгуульд намууд ялах магадлал өндөр, хамгийн лидер хүмүүсээ нэр дэвшүүлэх нь дамжиггүй.

Б.Лхам