Засгийн газрын өчигдрийн хуралдаанаар Хотын ерөнхий менежерээр УИХ-ын гишүүн асан Д.Ганболдыг томилсон. Тэрбээр, УИХ-ын гишүүнээр сонгогдохоосоо өмнө Чингэлтэй дүүргийн Засаг даргаар найман жил, дүүргийн намын хорооны даргаар ажиллаж байв. Өмнөх парламентын үед 65-уулаа байсан МАН-ын бүлэг хуваагдахад тэрбээр 32-ын бүлэг буюу “М.Энхболд” фракцид орж байлаа. Угаас тэрбээр МАН дахь Хотын гэгддэг байсан, тухайн үедээ хамгийн хүчирхэг фракцын дэмжлэгээр улс төрд орж, УИХ-ын гишүүн болж байв.

Гэсэн ч МАН хуваагдаж, хотын фракцын гол тулах хүч М.Энхболд МАН-ын даргын тамгаа, спикерийн суудалтайгаа алдсанаас хойш энэ фракцын хүч нь суларсан. Хотын гэгддэг нэр нь ч алга болж, улстөрийн хүрээнийхэнд “Миеэ фракц” эсвэл 32-ынхон гэгддэг болсон юм. Энэ фракцынханд өнгөрсөн УИХ-д нэр дэвших квот тун цөөхөн оногдсон бөгөөд Ё.Баатарбилэг, Ж.Мөнхбат, Г.Тэмүүлэн, Ж.Бат-Эрдэнэ, Ш.Раднаасэд, Ж,Эрдэнэбат, Б.Чойжилсүрэн, С.Бямбацогт нарын гишүүд өмнөх 32-ын фракцын төлөөлөл болон одоогийн УИХ-д сонгогдсон.

2020 оны сонгууль болон сонгуулийн үр дүнгийн талаар нам гүмхэн байсан энэ фракцынхан тэгвэл бүр мөсөн алга болчихоогүй гэдгээ зарлан Ардын намын хуваарилж байгаа албан тушаалуудад бага багаар очиж эхэлсний нэг нь өчигдрийн энэхүү хотын ерөнхий менежерийн томилгоо байлаа.

О.Балдан-Очир