УИХ-ын чуулганы нэгдсэн хуралдаан эхэллээ. Хуралдаанаар "Ажиллах хүчний шилжилт хөдөлгөөний тухай хуулийн шинэчилсэн найруулгын төсөл болон хамт өргөн мэдүүлсэн хуулийн төслүүд /Засгийн газар 2020.04.07-ны өдөр өргөн мэдүүлсэн, анхны хэлэлцүүлэг/-ийг" танилцуулж гишүүд үг хэлж асуулт асууж байна.

УИХ-ын гишүүн Ё.Баатарбилэг: "Ажлын хэсгээс асууя. Болосвролын салбарт ажиллах хүчин авчрах дээр асуулт асууя. Гадны орны сайн багш нарыг авч ажиллуулая гэхээр цалин хөлс өндөр байдаг. Мөн манай улсад ажиллуулахаар авчирсан багш нарын татвар хураамж нь нилээн өндөр байдаг.  Барилгын  салбарын ажилчидтай харьцуулмааргүй байна.

Яагаад гэвэл эрүүл мэнд, урлаг,  спорт, соёл, боловсролын салбарт урилгаар ажиллаж байгаа ашгийн бус багш мэргэжилтнүүдийн татвар хураамжийн асуудлыг эргэж нэг харж үзмээр байна гэсэн нэг асуудал яригддаг.

Францын элчин сайдтай уулзсан. Францын хэл соёлын төв дээр Франц хэл заадаг сургагч багш нарын виз, татвар хураамжийн асуудлыг хөндөж байсан. Энэ асуудлыг арай өөр ялгамжтай авч үзэж байгаа юм байгаа юу? Хөгжим бүжгийн коллеж дээр бас гадны хөгжмийн багш нарыг авч ирж ажиллуулдаг гэж байгаа. Тэнд бас нөгөө татвар хураамжийн асуудал яригддаг.

Төрийн өмчийн их дээд сургуулиуд гадны багш авч ирж ажиллуулахаар эд нарыг арай өөр ялгамжтай авч үзэж байгаа вэ?  Ямар өөрчлөлт орж байгаа вэ? гэдэг асуулт байна. Гаднаас орж ирж байгаа ажиллах хүчний татвар хураамжаас хөдөлмөр эрхлэлтийг  дэмжих чиглэл рүү хөрөнгө оруулалтаа оруулаад явдаг. Энэ удаагийн шинэчлэлсэн найруулгын 22-р зүйл дээр төрөл ангилал зүйлээр нилээд сайн ангилсан юм байна. Гол нь энэ татвар хураамж, өндөр нарийн мэргэжлийн хүмүүсийг хувийн хэвшлийн болон боловсролын байгууллагууд төрийн байгууллагуудад аль болох сайн мэргэжилтэн авчрахад энэ хууль том дэмжлэг болох ёстой гэж үзэж байна. Энэ дээр яг ямах зохицуулалт хэрхэн орж байна, ялгамжтай юм байна уу? Өмнөх хуулиасаа эрхзүйн нөхцөл нь дээрдэж байгаа юу. Ажлын хэсгээс асууж байна" гэлээ.

А.Сүх