Үндсэн хуулийн Цэцийн дунд суудлын хуралдаанаар өнөөдөр УИХ-ын гишүүн Н.Ганибал, Ш.Адьшаа нарын өргөдлийг хэлэлцэнэ. Тэд, Үндсэн хуулийн Гучин есдүгээр зүйлийн 1 дэх хэсгээр Үндсэн хуулийн Цэцэд өргөөдл гаргасан билээ. Энэхүү зүйлд, “Засгийн газар Ерөнхий сайд гишүүдээс бүрдэнэ. Ерөнхий сайд болон Засгийн газрын дөрвөөс илүүгүй гишүүн Улсын Их Хурлын гишүүний албан тушаалыг хавсарч болно” гэж заасан байдаг бөгөөд энэхүү заалтыг 2019 оны Үндсэн хуулийн нэмэлт, өөрчлөлтөөр өөрчлөн найруулсан юм. Харин энэ заалтыг 2020 оны тавдугаар сарын 25-ны өдрөөс мөрдөж эхэлсэн. Тодруулбал, энэ хүү заалтыг мөрдөж эхэлсээс хойш ердөө 1.6 жил л өнгөрч байгаа юм. Үндсэн хуулийн энэ өөрчлөлтөөр У.Хүрэлсүхийн Засгийн газар анх байгуулагдаж байсан.

Өнгөрсөн нэгдүгээр сард У.Хүрэлсүхийн Засгийн газар бүрэн бүрэлдэхүүнээрээ огцорч, Л.Оюун-Эрдэнийн Засгийн газар байгуулагдсан. Нэг үгээр хэлэхэд Үндсэн хуулийн энэ өөрчлөлтийн дагуу 1.6 жилд хоёр Засгийн газар байгуулагдаад байгаа гэсэн үг. Гэсэн ч дан дээлтэй сайдууд чадвар муу, УИХ-ын гишүүдийн өмнө өөрсдийн салбараа хамгаалж чадахгүй байна гэсэн шүүмжлэлийг эрх баригч намынхан дотроосоо эхлээд гаргасан.

Энэ нь даамжирч УИХ дахь АН-ын хоёр гишүүн Үндсэн хуулийн Цэцэд хандсанаар дунд суудлын хуралдаанаар хэлэлцэгдэхээр болоод байна. Хэдийгээр АН-ын гишүүд Цэцэд хандсан боловч уг хүсэл нь МАН-ын гишүүдийнх гэдэг нь хэн бүхэнд тодорхой болоод байгаа. УИХ дахь МАН-ын бүлгийн 63 гишүүний Засгийн газарт давхар ажиллаж байгаа дөрвөөс бусад нь буюу 59 нь үүнийг хүсч байгаа гэдэг нь маргаангүй. Тэгэхээр МАН-ын хүсэлтэй АН-ынхны гүйцэлдүүлж байгаа өргөдөлд Үндсэн хуулийн Цэц ямар хариулт өгөх вэ гэдэг нь ирэх жилийн улс төрийн өнгийг тодорхойлох биз ээ. Нэг ёсондоо Үндсэн хуулийн Цэцийн шийдвэр МАН-ынханд “Зул сарын бэлэг” болон очих нь ээ. Харин бэлэг нь тэдэнд таалагдах эсэх нь тун удахгүй тодорхой болох нь.

О.Балдан-Очир