Тулгар төрийн 2230 жил, Их Монгол Улс байгуулагдсаны 815 жил, Үндэсний эрх чөлөө, тусгаар тогтнолоо сэргээн мандуулсны 110 жил, Ардын хувьсгалын 100 жилийн ойг тохиолдуулан Монгол Улсын Ерөнхийлөгч У.Хүрэлсүх зарлиг гаргаж, эрхэлсэн ажилдаа олон жил үр бүтээлтэй, өндөр амжилт гарган, эх орныхоо хөгжил цэцэглэлтэд үнэтэй хувь нэмэр оруулж буй салбар салбарын тэргүүлэх зүтгэлтнүүдэд төрийн дээд одон, медаль гардуулсан.

Эрчим хүчний салбарт үнэтэй хувь нэмэр оруулж, олон жил үр бүтээлтэй ажилласан Түлш, эрчим хүчний үйлдвэрийн яамны сайд асан Содов овогтой Батхуяг, Эрдэс баялаг, эрчим хүчний дэд сайд асан Түндэв овогтой Энхтайван нарыг “МОНГОЛ УЛСЫН АЖ ҮЙЛДВЭРИЙН ГАВЪЯАТ АЖИЛТАН” цолоор шагнасныг Эрчим хүчний сайд Н.Тавинбэх өчигдөр гардуулан өглөө.

Сайд Н.Тавинбэх “Монгол Улсын гал голомт болсон эрчим хүчний салбараас шинэ оны босгон дээр хоёр гавъяат төрлөө. Та бүхний эх орныхоо хөгжил цэцэглэлтэд оруулсан хувь нэмрийг төр өндрөөр үнэллээ. Өмнө нь сайд байсан хүмүүс энэ хүндтэй шагналаар төрдөө үнсүүлж буйд хувь хүний зүгээс болон салбарын хамт олны зүгээс туйлын их баяртай байна. Хүндэтгэл үзүүлье. Та бүхэнд эрүүл энх, сайн сайхан бүхнийг хүсэн ерөөе” гэв.