Засгийн газрын шийдвэр танилцуулж байна. Энэ үеэр Ахмад настны тэтгэврийг нэмэгдүүлэх тухай шийдвэрийг Хөдөлмөр, нийгмийн хамгааллын сайд А.Ариунзаяа танилцууллаа. Тэрбээр “Монгол Улсын засгийн газрын зүгээс 2022оны хоёрдугаар сарын 1-ны өдрийн 63-р тоот тогтоолыг баталлаа. Энэхүү тогтоол нь тэтгэврийн хэмжээг нэмэгдүүлэх тухай юм. Нэгдүгээр заалт нь нийгмийн даатгалын сангаас олгож байгаа болон цэргийн алба хаасны тэтгэвэр авагчийн тэтгэврийн хэмжээг 15 хувиар нэмэгдүүлэх тухай байна. Хоёрдугаар заалт нь нийгмийн даатгалын сангаас авч байгаа энэхүү тэтгэврийг бүрэн тэтгэврийн доод хэмжээг 500 мянган төгрөгт хүргэх, хувь тэнцүүлсэн тэтгэврийн доод хэмжээг 400 мянган төгрөгт хүргэх юм. Мөн дагасан тэмдэглэлт сангийн сайд болон нийгмийн хамгааллын сайдад энэхүү тогтоол гарсантай холбогдуулан тэтгэврийг шуурхай зохион байгуулж олгохыг үүрэг болгосон. Мөн инфляцын төвшинтэй уялдуулан 15 хувиар нэмэгдүүлнэ. 2021 оны арванхоёрдугаар сарын мэдээгээр 458,7 мянган тэтгэвэр авч байна. Эдгээрийн 60 орчим хувь буюу 271 мянган иргэн тэтгэврийн доод хэмжээгээр тэтгэвэр авч байна. Бидний хувьд УИХ-аар төсвийн тодотголоо өчигдөр батлуулсан. Нийт нэмэгдэлд 637 орчим тэрбум төгрөг шаардлагатай болж байгаа юм. Ингэснээр 197,1 мянган хүний тэтгэвэр 50 мянгаас дээш төгрөгөөр, 72,3 мянган хүний тэтгэвэр 100 мянган төгрөгөөр, 200 мянган хүний тэтгэвэр 150 мянган төгрөгөөр тус тус нэмэгдэнэ. Дундаж тэтгэврийн хэмжээ 29,7 хувиар нэмэгдэж 548,4 мянган төгрөгт хүрч байна. Бид Засгийн газрын шийдвэр гармагц банкнууддаа шинэ нэмэгдсэн дүнгээрээ жагсаалтаа олгосон байгаа. Банкнуудын удирдлагуудтай сая холбогдлоо. Ойролцоогоор 3-4 цагийн дотор энэ шилжүүлгүүд орж дуусна гэсэн мэдээлэлтэй байна” гэв.