УИХ-ын чуулганы нэгдсэн хуралдаан үргэлжилж байна. Энэ үеэр Уул уурхай, хүнд үйлдвэрийн сайд Г.Ёндонгийн мэдээлэлтэй холбогдуулан сөрөг хүчний гишүүд асуулт асууж, хариулт авлаа. 

УИХ гишүүн Н.Алтанхуяг дараах асуултыг тавив.

- Оюу толгой жилд хэдэн тонн зэсийн баяжмал гаргаж байна. Цэвэр зэсрүү оруулбал хэд болох вэ?

- Зэс хайлах үйлдвэр Эрдэнэтэд барьж байна гээд байгаа. Энэ үйлдвэр ямар өртгөөр барьж байна вэ?

- Оюутолгой  цаашдаа яах вэ, ингээд байгаад л байх уу? Цагаан суварга ашиглалтад орвол бас яах юм?

- Бэрэнгийн арматурын үйлдвэр баригдсан гээд яриад байх юм. Энэ үнэхээр ашиглалтад орсон юм уу? Ямар хэмжээний чадалтай юм бэ?

- Дарханы уул уурхайн металлургийн цогцолбор гэж 2010 оноос эхэлж ярьсан. Энэ цогцолбор цаашдаа ашиглагдах юм уу, үгүй юм уу?

- Газрын тосны үйлдвэрлэл ямар чадалтай вэ? Энэ Дарханы зам шиг юм болох вий.

Уул уурхай, хүнд үйлдвэрийн сайд Г.Ёндон ийн хэлэв:

• Оюу толгойгоос гаргаж байгаа зэсийн баяжмалын хэмжээ жил бүр өөр байдаг. Ойролцоогоор 700 мянгаас нэг сая орчим тонн зэсийн баяжмал гаргадаг. Үүний зэсийн агууламж нь 25 орчим хувьтай. Иймд 4/1 нь зэс, 3-5 тонн алт, мөн хэмжээний мөнгө гэсэн үг.
• Газрын тосны бүтээгдэхүүний үйлдвэрлэл жилд 1,5 сая тонн түүхий эд боловсруулах хүчин чадалтай. БНЭУ-ын засгийн газрын  хөнгөлөлттэй зээлийн хүрээнд хэрэгжиж байгаа. Нөөцийн хувьд 380 орчим сая тонн түүхий тосны баталгаат нөөцтэй. Энэ нөөц ойролцоогоор 20 орчим жил үйлдвэрийг түүхий тосоор хангах нөөцтэй.
• Дарханы уул уурхайн металлургийн цогцолбор концессын гэрээгээр явж байгаа. Жилд 350 мянган тонн ган хийц үйлдвэрлэх үйлдвэр баригдана. Энэ хавар бүтээн байгуулалтын ажил эхэлнэ.
• Бэрэн группын арматурын үйлдвэр нээгдээд хэд хэдэн ажил хийгдсэн. БНСУ-руу ширэм экспортолж гаргадаг.  Арматур үйлдвэрлэхэд зайлшгүй шаардлагатай 2-3 дамжлага байхгүй.  Иймд УУХҮЯ Хөгжлийн банканд хандаж зээл олгох талаар санамж бичиг байгуулсан. Энэ асуудал ойрын үед шийдэгдэнэ гэж харж байгаа.
• Эрдэнэтийн зэсийн баяжмал боловсруулах үйлдвэр, Оюу толгойн зэсийн баяжмал боловсруулах үйлдвэр нь хоёр тусдаа төсөл байгаа. Оюу толгойн үйлдвэр 2017 онд Засгийн газрын тогтоолоор батлагдсан. Өмнөговь аймгийн Ханбогд суманд 460 га газраа авч, урьдчилсан үндэслэл хийгдсэн. Одоогийн байдлаар АНУ-ын USAID-ын санхүүжилтээр Хөрөнгө оруулагчийг шалгаруулах бичиг баримтыг боловсруулж байна. Иймд ирэх зургадугаар сарын 30-аас өмнө хөрөнгө оруулагчийг зарлах зорилготой ажиллаж байна. Харин Эрдэнэтийн зэсийн баяжмал боловсруулах үйлдвэрийн хувьд БНХАУ-ын төрийн өмчийн зураг төслийн хүрээлэнгээр урьдчилсан үндэслэл хийгдсэн. Эрдэс баялгийн зөвлөлийн шийдвэрээр туршилтын үйлдвэр байгуулах шаардлагатай гэж үзсэн учир туршилтын үйлдвэрийн ажил хийгдэж байна.

Т.Мөнхжаргал