Үндсэн хуулийн асуудлаар улсын их хурлын гишүүд болон зарим намын төлөөллүүд мэдээлэл хийж байна. Энэ үеэр УИХ-ын гишүүн С.Одонтуяа мэдээлэл өглөө.

Тэрбээр “Өнөөдөр Монгол улсад улс төрийн, эдийн засгийн хямрал болж байна. Ер нь  болж байгаа бүтэж байгаа зүйл тун ховор байна гэж иргэд жагсаж байгаа. Бид маш холын төлөвлөгөөтэй хөгжлийн бодлогоо дагаж ажиллах ёстой. Энэ бүгдийн суурь шалгаан юу вэ гээд харахаар сонгуулийн тогтолцоо болж байгаа юм. Сонгуулийн тогтолцоо бол энэ олон хямралыг авчрах үүд хаалгыг нээж өгч байгаа. Зөвхөн 2020 оны сонгууль гэхэд санал өгсөн сонгогчдын 42 хувь нь МАН-д санал өгсөн байхад, өнөөдөр УИХ дээр 83 хувь,  засгийн газар 100 хувь. Тэгэхээр хэт нэг намын давамгайлал улс орныг хөгжлийн гацаанаас гаргаж чадахгүй байгааг харуулж байна.

Би 2012-2016 онд холимог тогтолцоогоор сонгогдсон парламентад ажиллаж байсан. Улс төрийн намууд хоорондоо мэтгэлцдэг, гишүүд маш завгүй ажилладаг байсан. Харин сүүлийн хоёр парламент намын даалгавраар, хэн нэгний даалгавраар асуудлыг шийдэж байна. Энэ байдлыг өөрчлөхгүйгээр улс төрийн хямралаас гарч чадахгүй. Сөрөг хүчнийхээ үгийг сонсохгүй болохоор ард түмэн сөрөг хүчний үүрэг гүйцэтгэж гудамжинд гарч жагсаж байна. Уг нь бид парламент дотроо, чуулганы танхимдаа асуудлуудаа хэлэлцэж, шийдвэрлэх хэрэгтэй юм. Мөн тойргийн төсөв баталдаг тогтолцооноос салах хэрэгтэй. Улс төрийн төлөвшил, үзэл баримтлалтай байхын тулд яах аргагүй сонгуулийн тогтолцоог өөрчлөх шаардлагатай байна” гэв.

Д.Батчулуун