УИХ-ын чуулганы нэгдсэн хуралдаанаар Монгол Улсын 2022 оны Төсвийн тухай хуульд өөрчлөлт оруулах талаар хэлэлцэж байна. Төсвийн арван зургадугаар зүйлд дор дурдсан агуулгыг нэмэх, Үүнд:

16.1.8 Төсөв батлах, тодотгохдоо ДНБ-д эзлэх улсын төсвийн нийт зарлагын хэмжээг өмнөх батлагдсан дүнгээс ихгүйгээр батлах гэсэн саналын УИХ-ын гишүүн Т.Доржханд гишүүн УИХ-д оруулж ирсэн. Энэ саналыг Эдийн засгийн байнгын хороо дэмжиж, Төсвийн байнгын хороо дэмжээгүй юм.

Сангийн сайд Б.Жавхлан: Т.Доржханд гишүүний саналыг ойлгож байгаа. Гэхдээ нэг жилд баталчихсан төсвийг нэг зүйл, заалтаар хашчихаад амжихгүй. Үүн дээр асуудал үүснэ. Эсвэл нэг жилдээ аажмаар тодорхой хувиас хэтрэхгүй, жил бүр шат дараатайгаар төсвийг багасгана гэдэг ч юм уу аажмаар шилжихгүй бол болохгүй. Алдагдлын хэмжээг шат дараатайгаар багасгаад явж байгаа. Төсөв тодотгоход байж болох хэдий ч төсөв батлахад байж болохгүй, аажмаар байж болно.

УИХ-ын гишүүн Т.Доржханд: Ер нь бол худлаа юм байна. Сангийн сайд нь ойлгохгүй байна. Хэмнэлтийн бодлого оруулж ирж байвал хэмнэх хэрэгтэй шүү дээ Төсвийн байнгын хороон дарга аа. Оруулж ирж байгаа саналд дэмжиж байгаа зүйл алга. Гишүүд нь хуваагдаад Төсвийн байнгын хороон даргатайгаа үзээд л байна. Үр дүнд нь хэмнэлт байхгүй боллоо. Би энэ чиглэлээр 15 жил ажилласан хүн, энэ заалтыг оруулах гэж танай яамныхан хүртэл мөрөөддөг. Төсвийн тогтвортой байдлын хуулиар оруулах гэж байгаад арай ч ингэж хэлэхгүй байлгүй дээ гэтэл, 20-25 хувьтай байсан нийт эдийн засагт орж байгаа ДНБ-ий төсөв өнөөдөр 40 хувь болчхоод байна. Ингээд хамгийн том татвар төлөгч нь төр, хамгийн сайн бизнес хийдэг нь төр, төрөөр орж байж тендер авдаг ийм хөгийн Хойд Солонгосын системрүү орчхоод алга ташаад байх юм. Энд сууж байгаа хүмүүс ичих хэрэгтэй. Тойргийн төсвөөс яаж гарах вэ, бодлого ярьдаг парламенттай болъё гэж байхад жорлон яриад байх юм. Агуулга, концепцоо ойлгохгүй, эдийн засгийн онолоо судал, олон улсын төвшинг мэдэж байж шийдвэрээ гарга л даа. Би бүх саналуудаа татаж авлаа. Наад хэмнэлтийн бодлого чинь бүтэхгүй юм байна. Засгийн газрын гишүүд нь нийлж сууж байгаад бүгдийг нь унагаад явдаг. Зарчмын зүйл ярихаар ойлгодоггүй. Ийм ажил хэрэгч биш, мэдлэг мэдээлэлгүй байж болохгүй" гэж хэлээд танхимыг орхин гарав.

Т.Мөнхжаргал