УИХ-ын гишүүн С.Одонтуяа Ерөнхий сайдад шаардлага хүргүүлж буй талаар мэдээлэл хийлээ. Тэрбээр "Сүүлийн үед үндсэн хуулийн нэмэлт өөрчлөлттэй холбоотой асуудлууд улс орны анхаарлын төвд байна. Үндсэн хуулийн нэмэлт өөрчлөлттэй асуудлыг хэлэлцэхдээ гаднаас биш дороос нь өөрчлөх ёстой. УИХ дотроос нь тэмцэх ёстой гэсэн арга барилтай байна. Өнөөдөр миний бие Ерөнхий сайд Л.Оюун-Эрдэнэд шаардлага хүргүүлж байна. УИХ-ын тогтоолын төслийг өргөн барих гэж байгаа. Засгийн газар саналаа ирүүлэх ёстой байдаг. Гэвч Засгийн газар саналаа ирүүлэхгүй байгаа тул Ерөнхий сайдад шаардлага хүргүүлж байгаа.

Холимог тогтолцоог бий болгох тогтолцоо нь УИХ-д байгаа. Би Үндсэн хуулийн өөрчлөлтийг цогцоор нь хийхийг дэмжиж байгаа. 2016 оны тавдугаар сард Үндсэн хуулийн цэц хэсэг улс төрчидтэй хуйвалдаж, тавдугаар дүгнэлт гэгчийг оруулж ирсэн байдаг. УИХ өөрөө энэ тогтоолыг батлахад би хамгийн их эсэргүүцэж байсан хүмүүсийн нэг. Энэ нь сонгуулийн дэвшилтэт системийг устгаж байна гэж байсан. УИХ энэ тогтоолыг хүчингүй болгоход л холимог систем 2012 оны сонгуулийн тухай хуулиар хэвээр үлдэнэ. Ерөнхий сайдын зүгээс шаардлагын хариуг яаралтай ирүүлбэл би УИХ-д өргөн барина. Улс төрийн бүх намууд олон удаа уулзалдаж, зөвшилцөлд хүрсэн. Сонгуулийг холимог системээр явуулахгүй бол нэг нам ноёрхох нь туйлын хор уршиг дагуулж байна. Тухайлбал, Ковидын үеэр УИХ нэг өдөр л Засгийн газарт бүх эрхээ шилжүүлчихдэг. Нэг өдөр л хэрэгтэй төсвийг нь батлаад өгчихдөг. Ингэж дураар нь дургиулах нь системийн гажуудал гэж үзэж байна" гэв.

Д.Батчулуун