Чуулганы үдээс хойшхи хуралдаанаар Нийгмийн даатгалын сангийн хөрөнгийн чөлөөт үлдэгдлийн талаар хэлэлцэж байна. Энэ үеэр УИХ-ын гишүүн Б.Энхбаяр үг хэлж асуулт асуулаа. Тэрбээр "Нийгмийн даатгалын мөнгийг арилжааны банкинд байршуулж дундаас нь хүү цохих схем байдаг. Үүнийг төгөлдөржүүлсэн хүн нь С.Эрдэнэ гэж ярьдаг. Тухайн үед хүүг маш бага хэмжээгээр байршуулдаг байсан. Одоо гайгүй болсон. Дунджаар жилдээ тэтгэврийн сангаас 25-30 тэрбум төгрөгийг хүүгийн зөрүүнээс хармаалдаг байх магадлалтай гэдэг тооцоолол гарч байсан. Хоёрдугаарт, Нийгмийн болон Эрүүл мэндийн даатгалын шимтгэлийн өрөнд бараа материал авдаг авлигын схем байдаг. Арав гаруй жилийн өмнө Нийгмийн даатгалын сангаас өрөнд авсан 40-өөд машин байсан. ТЭЦ 4-ийн хашаанд байдаг. Үнэлгээ нь балансын үнэлгээгээр 40-80 саяын үнэтэй байтал очихоор төмрийн хог байдаг. Энэ бол авлига. Барилгын компаниуд НДШ-ээ төлдөггүй. Борлогдохгүй барилгаа өндөр үнээр шахаж хаадаг. Энэ мөн авлига. Тиймээс өрөндөө бараа материал авахгүй байх хуулийг НДЕГ-аас гаргаж байсан" гэв. 

Д.Батчулуун